മരടിലെ ഫ്ളാറ്റുകൾ തകർക്കപ്പെടുന്നത് നെഞ്ചിടിപ്പോടെയാണ് മലയാളികൾ ടെലിവിഷനിലൂടെ കണ്ടത്. എത്രവർഷങ്ങളിലെ സ്വപ്നങ്ങളും അദ്ധ്വാനങ്ങളുമാണ് അവിടെ തകർന്നുവീണത്! ആ കെട്ടിടങ്ങൾ പണിതുയർത്താൻ ഒരുപാടുപേരുടെ വിയർപ്പും കഷ്ടപ്പാടുകളും ഉണ്ടായിരുന്നു. എന്നാൽ തകർന്നുവീഴാൻ നിമിഷങ്ങൾ മാത്രം മതിയായിരുന്നു.
നമ്മുടെ ബന്ധങ്ങളും ഇങ്ങനെ തന്നെയല്ലേ? എത്ര വർഷം കൊണ്ടാണ് നാം ഓരോ ബന്ധങ്ങൾ വളർത്തിയെടുക്കുന്നത്. ആത്മാർത്ഥതയിൽ അസ്തിവാരമിട്ടും സ്നേഹം നനച്ചും പരസ്പരം കൈകൾ കോർത്തും നാം ബന്ധങ്ങളെ ദൃഢപ്പെടുത്തിക്കൊണ്ടിരിക്കുന്നു. പക്ഷേ ഉയർത്തിക്കൊണ്ടുവരാൻ ചെലവഴിച്ചത്ര സമയമോ ക്ഷമയോ ഇല്ലാതെയാണ് പല ബന്ധങ്ങളും നാം തന്നെ തകർക്കുന്നത്. തെറ്റിദ്ധാരണയാവാം… സ്വാർത്ഥതയാമവാം… ഈഗോയാവാം…വാശിയാകാം. വിട്ടുകൊടുക്കാനുള്ള സന്മനസ്സില്ലായ്മയാകാം… സംശയരോഗമാകാം. പലപല കാരണങ്ങൾ കൊണ്ടാണ് നമ്മുടെ ഓരോബന്ധങ്ങളും തകർന്നുപോകുന്നത്. സുഹൃദ്ബന്ധങ്ങൾ മുതൽ കുടുംബബന്ധങ്ങൾ വരെയുള്ളവയ്ക്ക് ഇത് ബാധകമാണ്.
ഇനി മറ്റൊരു വശം കൂടി.. തീരദേശ നിയമം ലംഘിച്ചുപണിതുയർത്തിയവ ആയതുകൊണ്ടാണ് മരടിലെ ഫ്ളാറ്റുകൾ പൊളിച്ചുനീക്കേണ്ടിവന്നത്. നാം നമ്മുടെ ബന്ധങ്ങൾ എവിടെയാണ് സ്ഥാപിക്കാൻ ശ്രമിക്കുന്നത് എന്നും ചിന്തിക്കണം. അനർഹമായിടത്തോ അവിഹിതമായിടത്തോ നാം ബന്ധങ്ങളെ വളർത്താൻ ശ്രമിച്ചാൽ അത് തകർക്കപ്പെടുക തന്നെ ചെയ്യും. കുടുംബത്തിന് വെളിയിൽ സ്ഥാപിച്ചെടുക്കാൻ ശ്രമിക്കുന്ന ബന്ധങ്ങളെല്ലാം കാലാന്തരത്തിൽ തകർന്നുവീഴും. അത് നിന്നിരുന്ന സ്ഥലം പോലും അറിയുകയുമില്ല.
നമുക്ക് നമ്മുടെ ബന്ധങ്ങളെ കഴിയും പോൽ തകരാതെ നോക്കാം. നല്ല സ്ഥലത്ത് ബന്ധങ്ങൾ സ്ഥാപിച്ചെടുക്കാനും ശ്രമിക്കാം.
ആശംസകളോടെ
വിനായക് നിർമ്മൽ
എഡിറ്റർ ഇൻ ചാർജ്