സങ്കല്പങ്ങൾ നല്ലതാണ്. പലതിനെയും കുറിച്ച് നമുക്ക് പലതരത്തിലുള്ള സങ്കല്പങ്ങളുമുണ്ട്. എന്നാൽ യാഥാർത്ഥ്യബോധം ഇല്ലാത്ത സങ്കല്പങ്ങൾ അപകടം വരുത്തിവയ്ക്കുന്നവയാണ്. യാഥാർത്ഥ്യബോധത്തെ അപ്രസക്തമാക്കിക്കൊണ്ട് സങ്കല്പങ്ങളുടെയും അവാസ്തവികതയുടെയും പുറകെ പോകുന്ന ഒരു ലോകത്തിലാണ് ഇപ്പോൾ നാം ജീവിക്കുന്നത്. അത് മറ്റൊന്നുമല്ല എഐയുടെ ലോകമാണ്. മനുഷ്യരൂപങ്ങൾക്കെല്ലാം ഇപ്പോൾ എഐ രൂപമാണ്. സോഷ്യൽമീഡിയായിൽ കണ്ടുമുട്ടുന്ന മുഖങ്ങളിൽ പലതിനും എഐ യുടെ മുഖമാണ്. മനുഷ്യൻ തന്നെയോ എന്ന് ആകാംക്ഷ ഉണർത്തിക്കൊണ്ട് അവ യഥാർത്ഥജീവിതങ്ങളെ വെല്ലുവിളിക്കുന്നു. മാത്രവുമല്ല മറ്റാരോ പറഞ്ഞതുപോലെ റിയൽ ലൈഫിനെക്കാളും റീൽ ലൈഫുകൾക്കാണ് ഇപ്പോൾ പ്രാധാന്യവും. റിയൽ ജീവിതത്തെ മറികടന്നു റീൽ ജീവിതങ്ങൾ മേൽക്കൈ നേടുന്നു.
സാങ്കേതികതയുടെ വളർച്ചയും ശാസ്ത്രത്തിന്റെ മുന്നേറ്റവും അതിശയിപ്പിക്കുന്നവിധത്തിലുളളതാകുമ്പോൾ മനുഷ്യന് അവന്റെ തനിമ നഷ്ടപ്പെടുന്നുണ്ടോയെന്നത് നാം ആഴത്തിൽ ചിന്തിക്കണം. അവന് തന്റെ ജീവിതഗന്ധം ഇല്ലാതാകുന്നുണ്ടോയെന്ന് സംശയിക്കണം. റീൽസും എ ഐയുമല്ല യഥാർത്ഥജീവിതം എന്ന് തിരിച്ചറിയുമ്പോഴാണ് എന്തെല്ലാം കുറവുകളുണ്ടെങ്കിലും ജീവിതത്തെയും മനുഷ്യനെയും അതിന്റെ എല്ലാവിധ ക്ഷതങ്ങളോടും വൈകല്യങ്ങളോടും രൂക്ഷതയോടും കൂടി സ്നേഹിക്കാൻ നമുക്ക് കഴിയുന്നത്.
എഐ ചിത്രങ്ങൾ നോക്കൂ ഏതൊരു മനുഷ്യനെയും വിസ്മയിപ്പിക്കുന്നവിധത്തിലുള്ള ആകാരഭംഗിയും സൗന്ദര്യവും പ്രകടമാക്കുന്നവയാണ് അവ. പക്ഷേ അവരെ നമുക്കൊരിക്കലും സ്വന്തമാക്കാനാവില്ല അവരോട് നമുക്കൊരിക്കലും സങ്കടങ്ങൾ പറയാനോ അവരുമായി സൗഹൃദം സ്ഥാപിക്കാനോ സാധിക്കില്ല. വാസ്തവരഹിതമായ ഒരു ലോകമാണ് അവ സൃഷ്ടിക്കുന്നത്. അത്തരം ഭാവനാലോകത്തിൽ നിന്ന് ഇറങ്ങിവന്ന് യഥാർത്ഥലോകത്തിൽ നിലയുറപ്പിക്കുക. റീൽ അല്ല മുഖ്യം റിയലാണ്. റിയലാകുമ്പോൾ അത്ര ആകർഷകമായിരിക്കണമെന്നില്ല, പക്ഷേ അതിൽ നമ്മുടെ തനിമയും വ്യക്തിത്വവുമുണ്ട്. അതുകൊണ്ട് റിയലാകുന്നതിൽ സന്തോഷിക്കുുക. റിയലാകുന്നതിൽ അഭിമാനിക്കുക.
സ്നേഹാദരങ്ങളോടെ
വിനായക് നിർമ്മൽ
എഡിറ്റർ ഇൻ ചാർജ്