ആത്മവിശ്വാസം തല ഉയർത്തിപ്പിടിക്കലാണ്, ലോകത്തെ നോക്കിയുള്ള സൗമ്യമായ പുഞ്ചിരിയാണ്, ഏതൊന്നിനോടും ക്രിയാത്മകമായി പ്രതികരിക്കാനുള്ള സന്നദ്ധതയാണ്.
നിരാശയോ അപകർഷതയോ ഇത്തരക്കാരിൽ കാണുകയില്ല. ഭാവിയെ സ്വപ്നം കാണാൻ കഴിയുന്നത് ആത്മവിശ്വാസമുള്ളവർക്കാണ്. ആത്മവിശ്വാസമുള്ള വ്യക്തി ആന്തരികമായി കരുത്തനാണ്.
മറ്റുള്ളവരിലുളള വിശ്വാസത്തിന് എപ്പോഴെങ്കിലുമൊക്കെ ഇളക്കം തട്ടിയേക്കാം. എന്നാൽ അവനവനിൽ വിശ്വാസമുളളവനെ അതൊന്നും ബാധിക്കുകയേ ഇല്ല.
ജീവിതത്തിന്റെ വിവിധ അനുഭവങ്ങളിലൂടെയും വ്യത്യസ്തമായ ലോകത്തിലൂടെയും കടന്നുപോകാൻ സഹായിക്കുന്നത് അയാളിലെ ആത്മവിശ്വാസമാണ്. വ്യക്തികളെ അഭിമുഖീകരിക്കാനും സാധ്യതകളെ അന്വേഷിച്ചുപോകാനും അത് പ്രചോദനമാകുന്നു. ആത്മവിശ്വാസമുള്ളവർ ഒരിക്കലും പിന്തള്ളപ്പെട്ടുപോകുന്നില്ല. അവർ ചിലപ്പോഴെങ്കിലും പരാജയപ്പെട്ടേക്കാം. എങ്കിലും തോൽവിക്ക് കീഴടങ്ങാതെ വീണ്ടും പരിശ്രമിക്കാനുള്ള ധൈര്യം അവരിലുണ്ട്.
ജീവിതത്തിലെ പല പ്രതികൂലങ്ങളിലും ആത്മവിശ്വാസത്തിന് മങ്ങലേൽക്കുകയോ ആത്മവിശ്വാസം നഷ്ടമായിപ്പോവുകയോ ചെയ്തിട്ടുള്ളവരാണ് നാം ഓരോരുത്തരും. ആത്മവിശ്വാസം നഷ്ടമായാൽ പിന്നെ അധികകാലം നമുക്ക് മുന്നോട്ടുപോകാനാവില്ല. ജീവിതത്തെ തിരിച്ചുപിടിക്കാൻ, ആനന്ദഭരിതമാക്കാൻ, ആത്മവിശ്വാസം കൂടിയേ തീരൂ.
ആത്മവിശ്വാസത്തോടെ ജീവിക്കാനുള്ളചില കുറിപ്പുകളാണ് ഈ ലക്കം ഒപ്പത്തിൽ ഉൾപ്പെടുത്തിയിരിക്കുന്നത്. വായനക്കാരെ ഇതേറെ സഹായിക്കുമെന്ന് പ്രതീക്ഷിക്കുന്നു. ആത്മവിശ്വാസത്തോടെ നമുക്ക് മുന്നേറാം. ചിറകുവിരിച്ച് നമുക്ക് പറക്കാം…
വിജയാശംസകളോടെ,
വിനായക് നിർമ്മൽ
എഡിറ്റർ ഇൻ ചാർജ്