പ്രതീക്ഷകളാണ് ജീവിതത്തിന്റെ സൗന്ദര്യവും സൗഭാഗ്യവും. പ്രതീക്ഷകളില്ലെങ്കിൽ ഒരാൾക്കുപോലും ഈലോകജീവിതം മുന്നോട്ടുകൊണ്ടുപോകാൻ കഴിയില്ല. ഇന്നലെത്തെക്കാളും ഇന്നത്തെക്കാളും നാളെ കൂടുതൽ നന്നായിരിക്കുമെന്ന പ്രതീക്ഷയാണ് ജീവിതത്തിന്റെ താളവും സംഗീതവുമായി മാറുന്നത്. പ്രതീക്ഷകളാവാം. പക്ഷേ അത് അമിതമാകുമ്പോൾ ചെറിയ പ്രശ്നമുണ്ട്. കാരണം അമിതമായ പ്രതീക്ഷകൾ ചിലപ്പോഴെങ്കിലും നമ്മെ നിരാശരാക്കിയേക്കും. ‘പ്രതീക്ഷയ്ക്കൊത്ത് ഉയർന്നില്ല..’ ഇങ്ങനെ ചില വിശദീകരണങ്ങൾ കേൾക്കാത്തവരായി ആരുമുണ്ടാവില്ല.
സിനിമകളെക്കുറിച്ചും പുസ്തകങ്ങളെക്കുറിച്ചും കായികമത്സരങ്ങളെക്കുറിച്ചും ഭരണകൂടങ്ങളെക്കുറിച്ചുമെല്ലാം ഇപ്രകാരം പറയാറുണ്ട്. അമിതമായി പ്രതീക്ഷിക്കുന്നതുകൊണ്ടാണ് പ്രതീക്ഷയ്ക്കൊത്ത് ഉയരാതെ വരുമ്പോൾ മനസ്സ് നിരാശപ്പെടുന്നത്.
വ്യക്തികളെക്കുറിച്ച് അമിതമായ പ്രതീക്ഷകൾ വച്ചുപുലർത്തുന്നവരുണ്ട്. ഭാവിയെക്കുറിച്ച് അമിതമായ പ്രതീക്ഷകൾ വച്ചുപുലർത്തുന്നവരുണ്ട്. ഓരോ പ്രവൃത്തികളെക്കുറിച്ചും ഇതുപോലെ തന്നെ പ്രതീക്ഷകൾ Hopefully, just not too muchനിലനിർത്തുന്നവരുണ്ട്. പക്ഷേ അവയൊന്നും പ്രാവർത്തികമാകണമെന്നില്ല.
ചില യാത്രക്കാരെ ശ്രദ്ധിച്ചിട്ടില്ലേ, ചിലർക്ക് തോളിൽ തൂങ്ങുന്ന സഞ്ചിയിൽ ഒതുങ്ങാവുന്ന വിധത്തിലുള്ള വളരെ കുറച്ച് സാധനങ്ങളേ കാണൂ. മറ്റ് ചിലർക്കാകട്ടെ എത്ര ലഗേജുകളുണ്ടെന്ന് എണ്ണിത്തീർക്കാൻപോലുമാവില്ല. എന്നാൽ ഇവരിൽ ആരുടെ യാത്രകളാണ് കൂടുതൽ സുഖകരം? അധികം ഗുകളില്ലാത്തവരുടേത്…അധികമില്ലെന്ന് കരുതി അവർക്ക് ഒന്നിനും കുറവുവരുന്നുമില്ല.
പ്രതീക്ഷകളെയും അമിതപ്രതീക്ഷകളെയും ഈ യാത്രക്കാരോടു ഉപമിക്കാം. അമിതമായ പ്രതീക്ഷകളില്ലാതെ ഭാവിയെയും വ്യക്തികളെയും സമീപിക്കാൻ കഴിയുമെങ്കിൽ ഒരിക്കലും നിരാശപ്പെടേണ്ടിവരില്ല. അപ്പോൾ കിട്ടുന്നതിലെല്ലാം സംതൃപ്തിയുണ്ടാകും, സന്തോഷമുണ്ടാകും. നന്ദിയുണ്ടാകും. മിതമാകാത്ത തെന്തും അമിതമാണെന്ന് മറക്കാതിരിക്കാം.
അമിതപ്രതീക്ഷകളില്ലാതെ പ്രതീക്ഷകളോടെ ജീവിതം ആസ്വദിക്കാൻ നമുക്ക് കഴിയട്ടെ.
ആശംസകളോടെ
വിനായക് നിർമ്മൽ
എഡിറ്റർ ഇൻചാർജ്