ഇരുപതും ഇരുപത്തിയഞ്ചും വർഷം പിന്നിട്ടതിനു ശേഷം സ്ത്രീകൾ ഭർത്താവിൽ നിന്ന് നിയമപരമായി വിവാഹമോചനം നേടുന്നു എന്ന് കേൾക്കുമ്പോൾ നാം അമ്പരക്കാറുണ്ട്. എന്താണ് അവർക്കിടയിൽ സംഭവിച്ചത്, എന്തുകൊണ്ടാണ് ഈ പ്രായത്തിൽ വിവാഹമോചനം നേടിയത് എന്നൊക്കെയുള്ള ചോദ്യങ്ങളും സംശയങ്ങളും മനസ്സിൽ ഉയരാറുണ്ട്. വേറെയേതങ്കിലും ബന്ധം അവൾക്കുണ്ടായിരിക്കും എന്ന നിഗമനത്തിൽ എല്ലാവരും ഒടുവിൽ എത്തിച്ചേരുകയും ചെയ്യും. എന്നാൽ എല്ലാ വിവാഹമോചനങ്ങൾക്കു പിന്നിലും ഇതുബാധകമല്ല. പിന്നെ എന്താവാം സ്ത്രീകൾ വിവാഹമോചനം ആവശ്യപ്പെടുന്നതിന് കാരണം?
പുരുഷനിൽ നിന്നുള്ള ദീർഘകാലത്തെ അവഗണനയും ദാമ്പത്യജീവിതത്തിലുണ്ടായിരിക്കൊണ്ടിരിക്കുന്ന വിരസതയും സ്ത്രീകളെ വിവാഹമോചനത്തിന് പ്രേരിപ്പിക്കുന്നതായിട്ടാണ് പുതിയ പഠനങ്ങൾ പറയുന്നത്.
സ്വാർത്ഥതയോടെ സ്ത്രീകളെ സമീപിക്കുന്നതും അവരുടെ വൈകാരികവും മാനസികവുമായ ആവശ്യങ്ങളെ നിരാകരിക്കുന്നതും പുരുഷനിൽ നിന്ന് സ്ത്രീകളെ അകറ്റുന്ന ഒരു പ്രധാനകാരണമാണ്. ഒരു ദിവസം കൊണ്ടോ ഒരു നിമിഷം കൊണ്ടോ സ്ത്രീയെടുക്കുന്ന തീരുമാനമല്ല വിവാഹമോചനം. വർഷങ്ങളായി അനുഭവിച്ചുകൊണ്ടിരിക്കുന്ന മാനസികസമ്മർദ്ദങ്ങളുടെയും മനോവിഷമത്തിന്റെയും ഫലമാണ് വിവാഹമോചനം.
സ്ത്രീയെ അവളാഗ്രഹിക്കുന്നവിധത്തിൽ പുരുഷൻ മനസ്സിലാക്കുന്നില്ല. വീട്/ കുടുംബം എന്ന വ്യവസ്ഥിതിയിൽ ഒരു സ്ത്രീ വർഷങ്ങളായി അനുഭവിക്കുന്ന സമ്മർദ്ദത്തിന്റെ ഫലമായി ഒടുവിൽ അവൾ എത്തിച്ചേരുന്ന സാധ്യതയാണ് വിവാഹമോചനം. വളരെ വൈകിയുള്ള ഇത്തരം വിവാഹമോചനങ്ങൾ ശ്രദ്ധിച്ചാലും ശ്രമിച്ചാലും ഒഴിവാക്കാവുന്നതേയുള്ളൂ. കുടുംബജീവിതത്തിന്റെ തുടക്കത്തിൽ എന്നതിനെക്കാളേറെ ശ്രദ്ധയും കരുതലും കൂടുതൽ ആവശ്യമായിരിക്കുന്നത് വിവാഹജീവിതം പത്തും ഇരുപതും വർഷം പിന്നിടുമ്പോഴാണ്. വർഷങ്ങളുടെ പഴക്കം പരസ്പരബന്ധത്തെ യാന്ത്രികമാക്കുകയും വിരസത സൃഷ്ടിക്കുകയും ചെയ്തേക്കാം. അതുകൊണ്ട് വൈകിയ വേളയിൽ പുരുഷനിൽ നിന്ന് വിട്ടുപോകാതിരിക്കാൻ സ്ത്രീയെ കൂടുതൽ പരിഗണിക്കുകയും സ്നേഹിക്കുകയും ചെയ്യുക. പരസ്പരം സംസാരിക്കാനും ഹൃദയം തുറന്ന് സംസാരിക്കാനും ഒരുമിച്ചുസമയം ചെലവിടാനും കേൾക്കാനും തയ്യാറാവുക.