ആർത്തവ വിരാമം അഥവാ മെനോപ്പോസ് എത്തിയാൽ ശരീരത്തിൽ വലിയ മാറ്റങ്ങൾ സംഭവിക്കുന്നതിനാൽ മുമ്പത്തെക്കാൾ കൂടുതലായി സ്ത്രീകൾ വ്യായാമം ചെയ്യേണ്ടത് അത്യാവശ്യമാണ്. ഹോർമോൺ നിലകളിൽ മാറ്റംവരുന്നതോടെ പ്രത്യേകിച്ച് ഈസ്ട്രജൻ കുറയുന്നതോടെ, മസിൽ മാസ്, എല്ലുകളുടെ ബലം, മെറ്റബോളിസം എന്നിവയെ എല്ലാം ദോഷകരമായി ബാധിക്കുന്നു.ഇതുകൊണ്ടുതന്നെ സ്ട്രെങ്ത് ട്രെയിനിംഗ് ഈ ഘട്ടത്തിൽ അത്യാവശ്യമാണ്. മെനോപ്പോസിന് ശേഷം ശരീരം എന്തുകൊണ്ട് മാറുന്നു എന്ന് നോക്കാം.
പ്രായം കൂടുന്തോറും മസിലുകൾ സ്വാഭാവികമായി കുറയും.മെനോപ്പോസിന് ശേഷം ഇത് വേഗത്തിലാകും. ഈസ്ട്രജൻ കുറയുന്നതാണ് ഓസ്റ്റിയോപോറോസിസ് സാധ്യത കൂട്ടുന്നത്.
വയറിനുചുറ്റും കൊഴുപ്പ് അടിഞ്ഞുകൂടാനും സാധ്യത കൂടുതലാണ്. ഇവയ്ക്കെല്ലാമുള്ള പരിഹാരമാണ് സ്ട്രെങ്ത് ട്രെയിനിംഗ്. മേൽപ്പറഞ്ഞ മൂന്നിനെയും ഒരുമിച്ച് നേരിടുന്ന ഏറ്റവും ഫലപ്രദമായ മാർഗമാണ് ഇത്. ഇതിനായി ആദ്യം ചെയ്യേണ്ടത് ലൈറ്റ് ഡംബൽസ് ഉപയോഗിക്കുകയാണ്. ആദ്യത്തെ ആവേശത്തിന് അനുസരിച്ച് കൂടുതൽ വെയ്റ്റ് എടുക്കാൻ ശ്രമിച്ചാൽ അത് ദോഷം വരുത്തിവയ്ക്കും. പരിശീലനമനുസരിച്ച് വെയ്റ്റ് കൂട്ടുക. തുടർച്ചയായ പരിശീലനത്തിലൂടെ മാത്രമേ വെയ്റ്റ് കൂട്ടാവൂ. ആഴ്ചയിൽ മൂന്നുദിവസമെങ്കിലും ഇത്തരത്തിലുള്ള എക്സർസൈസ് ചെയ്യണം. അപ്പർ ബോഡി, ലോവർബോഡി, കോർ എന്നീ ക്രമത്തിൽ ഇത് തിരിക്കാവുന്നതാണ്.
സ്ക്വാട്ട്സ്, ഡെഡ് ലിഫ്റ്റ്, സിറ്റപ്പ്സ് എന്നിവയെല്ലാം എല്ലുകൾക്ക് ഗുണം ചെയ്യുന്നവയാണ്. പത്തു മിനിറ്റ് വാം അപ്പും വർക്കൗട്ടിന് ശേഷം സ്ട്രെച്ചിംങും അനിവാര്യമാണ്. ശരീരം വേദനിച്ചാലേ വ്യായാമത്തിന് ഫലമുള്ളൂ എന്നൊരു ധാരണയുണ്ട്. അത് ശിരയല്ല. ചെറിയരീതിയിലുള്ള ശാരീരികവേദന സാധാരണം. പക്ഷേ കടുത്ത വേദനയും ജോയ്ന്റ് പെയ്നും ശ്രദ്ധിക്കേണ്ടതുണ്ട്. ഹെൽത്ത് ക്ലബുകളിൽ പോകാതെ വീട്ടിൽ വച്ചും ചെയ്യാവുന്ന ലളിതവും സുരക്ഷിതവുമായ സ്ട്രെങ്ത് ട്രെയിനിംങുകളുമുണ്ട്.
നടത്തം, നീന്തൽ, യോഗ എന്നിവയും സ്ട്രെങ്ത്ത് ട്രെയിനിങിനൊപ്പം ചെയ്യേണ്ടതാണ്. ആർത്തവവിരാമം കഴിഞ്ഞ സ്ത്രീകൾ ശ്രദ്ധിക്കേണ്ട കാര്യമാണ് പ്രോട്ടീൻ. ഈ ഘട്ടത്തിനു ശേഷം കൂടുതലായി പ്രോട്ടീൻ ആവശ്യമുണ്ട്. പയർവർഗങ്ങൾ, മുട്ട, മീൻ, പാൽ ഉല്പ്പന്നങ്ങൾ, നട്സ് എന്നിവയും ഡോക്ടറുടെ നിർദ്ദേശാനുസരണം സപ്ലിമെന്റുകളും കഴിക്കേണ്ടതാണ്. ആർത്തവവിരാമം ശരീരം ദുർബലമാകേണ്ട ഘട്ടമല്ല ബുദ്ധിപൂർവ്വം ശാരീരികക്ഷമത നിലനിർത്താനുള്ള ഘട്ടമാണ്. അതൊരിക്കലും വയസിനെതിരായ പോരാട്ടവുമല്ല സ്വതന്ത്രവും സജീവവുമായ ജീവിതത്തിലേക്കുളള പരിമാണഘട്ടമാണ്.
കടപ്പാട്: ഇന്റർനെറ്റ്
സ്ട്രെങ്ത് ട്രെയിനിംഗിന്റെ പ്രധാന ഗുണങ്ങൾ
മസിലുകൾ നിലനിർത്തുകയും ശക്തിപ്പെടുത്തുകയും ചെയ്യുന്നു
എല്ലുകളുടെ സാന്ദ്രത കൂട്ടുന്നു
മെറ്റബോളിസം മെച്ചപ്പെടുത്തുന്നു
ബാലൻസ്, സ്ഥിരത വർധിപ്പിക്കുന്നു
വീഴ്ചയും ഫ്രാക്ചറും ഒഴിവാക്കാൻ സഹായിക്കുന്നു
ആത്മവിശ്വാസവും മാനസികാരോഗ്യവും മെച്ചപ്പെടുത്തുന്നു.