മരിച്ചുപോയ ആളുടെ ട്രാന്സ് പ്ലാന്റ് ചെയ്ത ഗര്ഭപാത്രത്തില് നിന്ന് ലോകത്തിലെ ആദ്യത്തെകുട്ടി പിറന്നു. ബ്രസീലിലാണ് സംഭവം.ഈ മേഖലയില് ഇത് ആദ്യത്തെ സംഭവമാണ്. ജീവിച്ചിരിക്കുന്ന വ്യക്തി ഗര്ഭപാത്രം ദാനം ചെയ്ത് ആദ്യമായി കുട്ടി പിറന്നത് 2013 സ്വീഡനിലായിരുന്നു. നാല്പതോളം കേസുകളില് ഇത്തരത്തിലുള്ള ശ്രമം നടന്നിട്ടുണ്ട്. അങ്ങനെ 11 കുട്ടികള്ക്ക് ജന്മം നല്കാനും കഴിഞ്ഞിട്ടുണ്ട്.എന്നാല് മരിച്ചുപോയ ഒരാളുടെ ഗര്ഭപാത്രം സ്വീകരിച്ച് അതില് നിന്ന് ആദ്യമായിട്ടാണ് ഇങ്ങനെയൊരു ജനനം നടന്നിരിക്കുന്നത്. ഇതിനുമുമ്പും ചില ശ്രമങ്ങള് നടന്നിട്ടുണ്ടായിരുന്നുവെങ്കിലും അവയെല്ലാം പരാജയപ്പെടുകയാണ് ചെയ്തിരുന്നത്. 35 ആഴ്ചയും മൂന്നുദിവസവും പിന്നിട്ട പെണ്കുഞ്ഞിനെയാണ് സിസേറിയന് വഴിയായി പുറത്തെടുത്തത്. കുഞ്ഞിന് 2,550 ഗ്രാം തൂക്കവുമുണ്ട്. ബ്രസീലിലെ സാ പൗലോ യൂണിവേഴ്സിറ്റി ഹോസ്പിറ്റലാണ് ഈ ചരിത്രനേട്ടം സ്വന്തമാക്കിയിരിക്കുന്നത്. 2016 ലാണ് 32 കാരിയായ യുവതിക്ക് യൂട്രസ് ട്രാന്സ്പ്ലാന്റ് ചെയ്തത്. ജന്മലാ ഈ സ്ത്രീക്ക് യൂട്രസ് ഉണ്ടായിരുന്നില്ല. സ്ട്രോക്ക് മൂലം മരണമടഞ്ഞ ഒരു നാല്പത്തിയഞ്ചുകാരിയുടെ ഗര്ഭപാത്രമാണ് തുന്നിപ്പിടിപ്പിച്ചത്. ഇതിന് ശേഷം അഞ്ചുമാസം കഴിഞ്ഞപ്പോള് മുതല് സ്ത്രീക്ക് തുടര്ച്ചയായ മാസങ്ങളില് ആര്ത്തവവുമുണ്ടായിതുടങ്ങിയിരുന്നു. സ്ത്രീകളിലെ വന്ധ്യതയ്ക്ക് പ്രധാന കാരണമായി മെഡിക്കല് ലോകം കണ്ടെത്തിയിരിക്കുന്നത് ഗര്ഭപാത്രവുമായി ബന്ധപ്പെട്ട പ്രശ്നങ്ങളാണ് ലോകമെങ്ങും പത്തുമുതല് പതിനഞ്ച് ശതമാനം വരെ ദമ്പതികളെ വന്ധ്യത അലട്ടുന്നുണ്ട്. യൂട്രസ് ട്രാന്സ്പ്ലാന്റിന് മുമ്പുവരെ ദമ്പതികളുടെ അനപത്യതാ ദുഖം പരിഹരിക്കാനുള്ള ഏകമാര്ഗ്ഗങ്ങള് ദത്തെടുക്കലോ വാടകയ്ക്കുള്ള ഗര്ഭപാത്രമോ ആയിരുന്നു. എന്നാല് യൂട്രസ് ട്രാന്സ്പ്ലാന്റേഷനിലൂടെ അവയ്ക്ക് പരിഹാരം കണ്ടെത്തിയിരിക്കുന്നു.
