ജീവിതം പുതിയതാണോ? ഒരിക്കലുമല്ല. ഓരോരുത്തരുടെയും ഇതുവരെയുള്ള ആയുസിന്റെ കണക്ക് അനുസരിച്ച് അത്രത്തോളം വർഷം പഴക്കമുണ്ട് ഓരോ ജീവിതങ്ങൾക്കും. എന്നാൽ ജീവിതത്തെ നേരിടുന്ന രീതികൊണ്ടും സമീപനം കൊണ്ടും പുതിയതായി മാറ്റിയെടുക്കാൻ കഴിയും. കാലപ്പഴക്കം കൊണ്ട് നിറം മങ്ങിപ്പോയ വീടുകൾക്ക് പുതുതായി നിറം ചാർത്തുന്നതുപോലെ… വാടിത്തളർന്നുനില്ക്കുന്ന ചെടികൾക്ക് തണലും വെള്ളവും നല്കുന്നതുപോലെ… വാഹനങ്ങൾക്ക് സമയാസമയം സർവീസിങ് നടത്തി മുന്നോട്ടുകുതിക്കാനുള്ള ഊർജ്ജം നല്കുന്നതുപോലെ…
ജീവിതത്തെ നവീകരിക്കാനുള്ള ഉത്തരവാദിത്വം നമ്മുടെ ഓരോരുത്തരുടെയുമാണ്. അതിന് ആദ്യം ചെയ്യേണ്ടത് ജീവിതസമീപനങ്ങളിലും കാഴ്ചപ്പാടുകളിലും ബോധപൂർവ്വം മാറ്റം വരുത്തുകയാണ്. മനോഭാവങ്ങളിൽ മാറ്റമുണ്ടാകുമ്പോൾ ജീവിതം തന്നെ മാറിപ്പോകും. ജീവിതത്തെ തിരിച്ചുപിടിക്കുക അതിന്റെ എല്ലാ സന്തോഷങ്ങളോടും കൂടി മാത്രമല്ല ക്ഷതങ്ങളോടും കൂടി.. രാവും പകലും ചേരുന്നതാണല്ലോ ദിവസം. ജീവിതവും അങ്ങനെയാണ്.
എത്രയെത്ര പ്രതീക്ഷകൾ മങ്ങിപ്പോയിട്ടുണ്ടാവും ഇതുവരെയും നമുക്ക്. എത്രയെത്ര തെറ്റിദ്ധാരണകളും അകൽച്ചകളും ഉണ്ടായിട്ടുണ്ടാവും. എത്രയോ കൃതജ്ഞതാലംഘനങ്ങൾ നേരിട്ടിട്ടുണ്ടാവാം. എത്രയോ പ്രിയപ്പെട്ടവരെ നഷ്ടമായിട്ടുണ്ടാകും. അതൊക്കെയും നമ്മൾ നേരിടേണ്ടവയായിരുന്നു. അവയിലൂടെയെല്ലാം നാം കടന്നുപോകേണ്ടതായിരുന്നു.
പക്ഷേ ജീവിതം ഇനിയും മുമ്പിലുണ്ട്. നമുക്ക് അതിലൂടെ കടന്നുപോയേ തീരൂ. മുന്നോട്ടുള്ള യാത്രയും സുഖകരവും സന്തോഷകരവുമാണെന്ന് ഉറപ്പുപറയാനാവില്ല. ആണെങ്കിൽ നല്ലത്. അല്ലാത്തപ്പോഴും തളരാതിരിക്കുക. തളർന്ന് പിന്തിരിയാതെയും. കാരണം ഇനിയും നമ്മൾ അനേകം അനുഭവങ്ങളിലൂടെ കടന്നുപോകേണ്ടതായിട്ടുണ്ട്. ജീവിതത്തിന്റെ പാതിവഴി മാത്രം പിന്നിട്ടവരുമാണ് നമ്മൾ നമുക്ക് നേടാൻ ഇനിയും പലതുണ്ട്. നമുക്ക് ഈ സമൂഹത്തിന് നല്കാനും പലതുമുണ്ട്.
പുതിയ യാത്രയ്ക്കുള്ള ചില എളുപ്പവഴികൾ വരുന്ന പേജുകൾ മുതൽ അവിടവിടെയായി കുറിച്ചുവച്ചിട്ടുണ്ട്. പ്രയോജനപ്പെടുമെന്ന് തന്നെയാണ് പ്രതീക്ഷ. പ്രയോജനപ്പെടുത്തണമെന്നാണ് അഭ്യർത്ഥനയും.
നീണ്ടുവിശാലമായി കിടക്കുന്ന പുതുവർഷവഴിയിലേക്ക് എല്ലാവർക്കും സ്വാഗതം. നമുക്ക് ഒരുമിച്ച് മുന്നോട്ടു നടന്നുതുടങ്ങാം.
പുതുവത്സരാശംസകളോടെ…
വിനായക് നിർമ്മൽ
എഡിറ്റർ ഇൻ ചാർജ്