കോവിഡ് വന്നുപോയി, ഇനി സമാധാനമായി എന്ന് ആശ്വസിച്ചിരിക്കുകയാണോ? അത്തരം ആശ്വാസത്തിന് വലിയ പ്രസക്തിയില്ലെന്നാണ് പഠനങ്ങൾ. കാരണം കോവിഡ് 19 ബാധിച്ചവരിൽ ഗുരുതരമായ ആരോഗ്യമാനസിക പ്രശ്നങ്ങൾ കാണപ്പെടുന്നതായിട്ടാണ് പഠനം. വാഷിംങ്ടൺ കേന്ദ്രമായുള്ള മയോ ക്ലിനിക്ക് ആണ് ഈ വിവരം പുറത്തുവിട്ടത്. പഠനം നടത്തിയ 80 ശതമാനം പേർക്കും കടുത്ത ക്ഷീണവും തളർച്ചയും അനുഭവപ്പെടുന്നു. കൂടാതെ കടുത്ത മാനസിക പിരിമുറുക്കത്തിനും അവർ ഇരകളാകുന്നുണ്ട്. കോവിഡ് മുക്തമായാലും രോഗികൾക്ക് കൂടുതൽ ശ്രദ്ധയും വിശ്രമവും പരിചരണവും നല്കേണ്ടിയിരിക്കുന്നു എന്നതിലേക്കാണ് ഇത് വിരൽ ചൂണ്ടുന്നത്.
അതുപോലെ കോവിഡ് രോഗമുക്തി നേടിയ അമ്പതുശതമാനം പേർക്കും ഹൃദ്രോഗമുണ്ടാകുന്നുണ്ടെന്നും ഓക്സ്ഫോഡ് ജേണൽ നടത്തിയ പഠനം പറയുന്നു. മാസങ്ങൾക്ക് ശേഷമാണ് പലരിലും ഹൃദ്രോഗ ലക്ഷണങ്ങൾ കാണപ്പെടുന്നത്. കോവിഡ് വൈറസ് ശരീരത്തിലുണ്ടാക്കുന്ന അണുബാധ ഹൃദയപേശികളെ ദുർബലമാക്കുകയും ഹൃദയതാളം തെറ്റിക്കുകയും രക്തം കട്ടപിടിക്കാൻ ഇടയാക്കുകയും ചെയ്യുന്നുവത്രെ. കൂടാതെ വൈറസ് ഹൃദയത്തിലെ മയോകാർഡിയം ടിഷ്യുവിലുള്ള എസിഇ2 റിസപ്റ്ററുകളുമായി നേരിട്ട് ബന്ധപ്പെട്ടും നാശമുണ്ടാക്കുന്നു.
ശ്വാസംമുട്ടൽ, ക്ഷീണം, മുട്ടുകളിലും പാദത്തിലും കാലുകളിലും ഉള്ള നീർക്കെട്ട്, താളംതെറ്റിയ ഹൃദയമിടിപ്പ്, വ്യായാമം ചെയ്യാനുള്ള കഴിവില്ലായ്മ, തുടർച്ചയായ ചുമ, വിശപ്പില്ലായ്മ തുടങ്ങിയവയും പ്രത്യക്ഷപ്പെട്ടാൽ എത്രയും പെട്ടെന്ന് തന്നെ വിദഗ്ദ ചികിത്സ തേടേണ്ടതുണ്ടെന്നും പഠനം പറയുന്നു. ഹൃദയാരോഗ്യവുമായി ബന്ധപ്പെട്ട ചില പ്രശ്നങ്ങളുടെ സൂചനകളായിരിക്കാമത്രെ ഇത്.
പ്രമേഹം, ബി.പി എന്നിവയുള്ളവരിൽ കോവിഡ് എളുപ്പത്തിൽ പിടികൂടാനുളള സാധ്യതയുണ്ടെന്ന് ഇസ്രയേലിൽ നിന്നുള്ള പഠനം വ്യക്തമാക്കുന്നു. അമിതവണ്ണമുള്ളവരും കരുതലോടെ ജീവിക്കേണ്ടതിന്റെ ആവശ്യകതയും ഈ പഠനം ഓർമ്മിപ്പിക്കുന്നുണ്ട്.