‘ജാതിയൊക്കെ മരിക്കുന്നതുവരെയേ ഉള്ളൂ…’ അടുത്തയിടെ റീലിസ് ചെയ്ത ഫഹദ് ഫാസിൽ ചിത്രമായ മലയൻകുഞ്ഞിൽ ജാഫർ ഇടുക്കിയുടെ കഥാപാത്രം പറയുന്ന ഡയലോഗാണ് ഇത്.
പക്ഷേ, മരിക്കുന്നതുവരെ നമുക്ക് ജാതി ഉണ്ട് എന്നതാണ് വാസ്തവം.അതിനേറ്റവും വലിയ ഉദാഹരണമായിരുന്നു രാജസ്ഥാനിൽ നടന്ന സംഭവം.അധ്യാപകരുൾപ്പെടെ ഉന്നതകുലജാതരായ ആളുകൾക്കുവേണ്ടി മാറ്റിവെച്ച പാത്രത്തിൽ നിന്ന് വെള്ളം കുടിക്കുകയോ പാത്രത്തിൽ തൊടുകയോ ചെയ്തതിന് അധ്യാപകൻ ഒമ്പതു വയസുകാരനായ ദളിത് ബാലനെ മർദ്ദിച്ചു. ജൂലൈയിലായിരുന്നു സംഭവം. ചികിത്സയിലിരിക്കെ കുട്ടി ഓഗസ്റ്റിൽ മരണമടഞ്ഞു. സ്വാതന്ത്ര്യത്തിന്റെ 75 ാം വാർഷികം ആഘോഷിച്ച വേളയിലായിരുന്നു ആ മരണവാർത്തയെത്തിയത്.
കാലം എത്ര പുരോഗമിച്ചാലും സാങ്കേതികമായി വളർന്നാലും മനുഷ്യൻ ഇപ്പോഴും ചില സങ്കുചിത ചിന്താഗതികളിൽ കെട്ടുപിണഞ്ഞു കിടക്കുന്നുവെന്നത് ഖേദകരമാണ്. ജാതിക്കും മതത്തിനും അപ്പുറമായി മനുഷ്യനെ, മനുഷ്യനായി കാണാൻ കഴിയുമ്പോഴേ മനുഷ്യത്വം എന്ന അവസ്ഥ മനോഹരമായിത്തീരുകയുള്ളൂ.
എന്തിനും ഏതിനും ജാതിയും മതവും അന്വേഷിക്കുകയും അതിന്റെ പേരിൽ വേർതിരിവുകൾ സൃഷ്ടിക്കുകയും ചെയ്യുന്നവർ ചില കാര്യങ്ങൾ കൂടി മനസ്സിലാക്കിയിരിക്കണം. വായുവിന് ജാതിയോ മതമോ ഇല്ല. സൂര്യവെളിച്ചത്തിൽ ജാതിയോ മതമോ കലർന്നിട്ടില്ല. വെള്ളത്തിന്റെ കാര്യവും അങ്ങനെ തന്നെ. മനുഷ്യന് നിലനിന്നുപോരാൻ അടിസ്ഥാനാവശ്യങ്ങളായ ഇവയ്ക്കൊന്നും ജാതിയില്ലെങ്കിൽ, മനുഷ്യരായ നമുക്കെന്തിനാണ് ജാതീയമായ വിഭാഗീയതകൾ?
ജാതിയുടെയും മതത്തിന്റെയും പേരിലുള്ള സംവരണങ്ങൾ തന്നെ പ്രശ്നം പിടിച്ച ഒരേർപ്പാടായി തോന്നുന്നുണ്ട്. യോഗ്യതയുള്ളവരും കഴിവുള്ളവരും മുന്നോട്ടുവരട്ടെ.ആരുടെയും ജാതിയും മതവും മറ്റാരും അന്വേഷിക്കാതിരിക്കട്ടെ. ഒരാളുടെ സ്വകാര്യത പോലെ അത്തരം കാര്യങ്ങളും സംരക്ഷിക്കപ്പെടട്ടെ.
ജാതിയും മതവുമില്ലാത്ത, മാനുഷരെല്ലാവരും ഒന്നുപോലെയായിരുന്ന ഒരു മാവേലിക്കാലത്തിന്റെ അനുസ്മരണത്തിലൂടെയാണ് ഈ മാസം നാം കടന്നുപോകുന്നത്. എല്ലാവർക്കും ഓണത്തിന്റെ
ആ വലുപ്പം തിരിച്ചറിയാനാകട്ടെ.
എം.ടിയുടെ സിനിമയിലെ ഒരു കഥാപാത്രം പറയുന്ന ഡയലോഗോടെ ഇതവസാനിപ്പിക്കാം.. ‘പുരുഷനും സ്ത്രീയുമെന്ന ജാതി, സ്നേഹമെന്ന മതം.’
ആശംസകളോടെ
വിനായക്നിർമ്മൽ
എഡിറ്റർ ഇൻ ചാർജ്
