പലതരത്തിലുള്ള ഉത്കണ്ഠകളിലൂടെ, മാനസികസമ്മർദ്ദങ്ങളിലൂടെ കടന്നുപോകുന്നവരാണ് എല്ലാവരും. ഓരോരുത്തരും നേരിടുന്ന പ്രശ്നം എന്താണോ അതനുസരിച്ചായിരിക്കും അവരുടെ ഉത്കണ്ഠകളുടെ തോത്. ഇത്തരം സന്ദർഭങ്ങളെ നേരിടാനുളള ഒരു എളുപ്പമാർഗം പറയാം. ഇതിനാദ്യം ചെയ്യേണ്ടത് ഒരു പേപ്പറും പേനയും എടുക്കുകയാണ്. ഉത്കണ്ഠയുടെ മുമ്പിൽ എന്തു ചെയ്യണമെന്നറിയാതെ വിഷമിക്കുമ്പോൾ ഏറ്റവും എളുപ്പമാർഗത്തിലേക്ക്പ്രവേശിക്കുന്നതിനുള്ള തുടക്കമാണ് അത്. പേനയും പേപ്പറും എടുത്തതിന് ശേഷം എഴുതിത്തുടങ്ങുക. വലിയ ലേഖനങ്ങളോ ഗഹനമായ വിഷയങ്ങളോ ആയിരിക്കണമെന്നില്ല മറിച്ച് ഞാൻ എന്തിനെയാണ് ഇപ്പോൾ ഭയക്കുന്നത്, എനിക്ക് എന്തുകൊണ്ടാണ് ആ ഉത്കണ്ഠയെ നിയന്ത്രിക്കാൻ കഴിയാത്തത്, ഒരു മണിക്കൂറിനോ രണ്ടു മണിക്കൂറിനോ ശേഷം ഇതെത്രത്തോളം ഗൗരവകരമായിരിക്കും എന്നീ ചോദ്യങ്ങളാണ് ആദ്യം എഴുതേണ്ടത്.
എന്തിന് എഴുതുന്നു എന്ന് ചോദിച്ചാൽ അതിനുള്ള ഉത്തരം ഇതാണ്. ഉത്കണ്ഠകൾ തലയിൽ മാത്രമായിരിക്കുമ്പോൾ വളരെ വലുതാണെന്ന് നമുക്ക് തോന്നും. അത് അമൂർത്തമാണ്. പക്ഷേ പേപ്പറിൽ എഴുതുമ്പോൾ അത് മൂർത്തമായി അനുഭവപ്പെടുന്നു. നമുക്ക് അവയെക്കുറിച്ച് വ്യക്തത കിട്ടുന്നു. മാത്രവുമല്ല അവയെ എങ്ങനെയാണ് കൈകാര്യം ചെയ്യേണ്ടത് എന്നതിനെക്കുറിച്ചും മനസ്സിലാക്കാനാവും. അതോടെ അവയെ കൈകാര്യം ചെയ്യാൻ കൂടുതൽ എളുപ്പമാകുന്നു. ഭയപ്പെട്ടിരുന്നതുപോലെയോ ആശങ്കപ്പെട്ടതുപോലെയോ അല്ല കാര്യങ്ങൾ എന്ന് മനസ്സിലാക്കാനാവും തലയുടെ പുകച്ചിൽ അവസാനിക്കുന്നു, അസ്വസ്ഥതകൾ കുറയുന്നു. അധികസമയം എഴുതാൻ ചെലവഴിക്കണമെന്നില്ല. മൂന്നു മുതൽ അഞ്ചു മിനിറ്റ് വരെ സമയം മതിയാവും. അപ്പോഴേയ്ക്കും മനസ്സ് ശാന്തമായിത്തുടങ്ങും. തിളച്ചുവരുന്ന പാൽ സ്റ്റൗ ഓഫാക്കുന്നതോടെ കെട്ടടങ്ങുന്നതുപോലെ മനസ്സിലെ ഉത്കണ്ഠകൾ കുറഞ്ഞുകുറഞ്ഞുവരുന്നു. വളരെ ലളിതമായി നമുക്ക് ഇത് തോന്നിയേക്കാം. എന്നാൽ നിരവധി പേർ ഫലം കണ്ടെത്തിയ ഒരു രീതിയാണ് ഇത്. ഏതെങ്കിലും വിഷയത്തെച്ചൊല്ലി ടെൻഷൻ വരുമ്പോൾ മൊബൈലെടുത്ത് സ്ക്രോൾ ചെയ്യുന്നതാണ് പുതിയ ട്രെൻഡ്. അത് അസ്വസ്ഥത വർദ്ധിപ്പിക്കുകയേയുള്ളൂ. പകരം എഴുതിത്തുടങ്ങുമ്പോൾ മനസ്സ് ശാന്തമാകും. അതുകൊണ്ട് ഇനിമുതൽ ഈ പരീക്ഷണം നടത്തിനോക്കൂ..
