തക്കാളി ശരിക്കും പച്ചക്കറിയാണോ പഴവർഗ്ഗമാണോ? ഭൂരിപക്ഷത്തിന്റെയും ധാരണ തക്കാളി പച്ചക്കറി എന്നാണ്. എന്നാൽ തക്കാളി പഴവർഗ്ഗത്തിൽ പെടുന്നു എന്നാണ് സൗത്ത് അമേരിക്കയിലെ ഗവേഷകർ പറയുന്നത്. പച്ചയ്ക്കും വേവിച്ചും കഴിക്കുന്ന തക്കാളി സലാഡ്, പിസാ, ഡ്രിംഗ്സ് എന്നിവയിലെല്ലാം ഉൾപ്പെടുന്നുണ്ട്. തക്കാളി കഴിക്കുന്നത് ആരോഗ്യത്തിന് വളരെയധികം ഗുണപ്രദം എന്നാണ് വിദഗ്ദരുടെ അഭിപ്രായം. എന്തൊക്കെയാണ് തക്കാളിയുടെ ഗുണങ്ങൾ എന്നല്ലേ പറയാം.
വിറ്റമിൻ സി, പൊട്ടാസ്യം, വിറ്റമിൻ കെ, ഫോലെറ്റ് എന്നിവ ഇതിൽ അടങ്ങിയിരിക്കുന്നു. ദിവസവും ശരീരത്തിന് ആവശ്യമായ വിറ്റമിൻ സിയുടെ 28 ശതമാനം തക്കാളിയിലൂടെ ലഭിക്കുന്നുണ്ട്. കാൻസറിന് കാരണമാകാവുന്ന ഘടകങ്ങളെ പ്രതിരോധിക്കാൻ വിറ്റമിൻ സിക്ക് കഴിവുണ്ട്. പ്രത്യേകിച്ച് പ്രോസ്റ്റേറ്റ് കാൻസറിന് കാരണമാകാവുന്ന മുഴകൾ ഉണ്ടാകാതിരിക്കാൻ. ആരോഗ്യകരമായ ബ്ലഡ് പ്രഷർ, ഹൃദയാരോഗ്യം, കണ്ണുകളുടെ ആരോഗ്യം, ത്വക്ക്, മുടി, നഖം തുടങ്ങിയവയുടെ ആരോഗ്യത്തിനും തക്കാളി നല്ലതാണ്. മലബന്ധം ഒഴിവാക്കുകയും ചെയ്യും. ഗർഭിണികൾക്ക് ഫോളിക് ആസിഡ് ഡോക്ടർമാർ നിർദ്ദേശിക്കാറുണ്ടല്ലോ. തക്കാളിയിൽ ഇത് വൻതോതിൽ അടങ്ങിയിട്ടുണ്ട്. അതുകൊണ്ട് ഗർഭിണികൾ പതിവായി കഴിക്കണം.
എല്ലാവരും ദിവസം ഒന്നുമുതൽ അഞ്ചുവരെ തക്കാളി കഴിക്കണമെന്നാണ് വിദഗ്ദർ പറയുന്നത്. പലതരം തക്കാളികൾ നിലവിലുണ്ട്. അതുകൊണ്ട് എണ്ണം പറയുമ്പോൾ നമ്മുടെ നാട്ടിലേതുവച്ച് നോക്കുമ്പോൾ വ്യത്യാസം വരാം. കലോറി കുറവും ജലാംശം കൂടുതലുമാണ് തക്കാളിയിൽ. പൊതുവെ സുരക്ഷിതമാണ് നിത്യവുമുള്ള തക്കാളി ഉപയോഗം. എങ്കിലും തക്കാളിയിലുള്ള മാലിക് ആസിഡും സിട്രിക്ക് ആസിഡും വയറ്റിൽ നെഞ്ചെരിച്ചിൽ ഉണ്ടാക്കാനും സാധ്യതയുണ്ട്. അതുകൊണ്ട് ദഹനസംബന്ധമായ പ്രശ്നങ്ങൾ ഉള്ളവരും ഗ്യാസ്ട്രോ രോഗങ്ങളുള്ളവരും അമിതമായി തക്കാളി കഴിക്കരുത്. കിഡ്നിയിൽ കല്ലുണ്ടാക്കാനും ഇത് കാരണമായിത്തീരാം.