ദൈനംദിന ഭക്ഷണത്തിൽ നിർബന്ധമായും ഉൾപ്പെടുത്തേണ്ട ഒന്നാണ് ഈന്തപ്പഴം. കാരണം നിരവധി ആരോഗ്യഗുണങ്ങളാണ് ഈന്തപ്പഴത്തിനുള്ളത്. ഈന്തപ്പഴത്തിൽ കാർബോഹൈഡ്രേറ്റ്സ്, പഞ്ചസാര, ഡയറ്ററി ഫൈബർ, പ്രോട്ടീൻ, പൊട്ടാസ്യം, മഗ്നീഷ്യം തുടങ്ങിയവയെല്ലാം അടങ്ങിയിട്ടുണ്ട്. ആന്റി ഓക്സിഡന്റുകളും ഇതിൽ ധാരാളമായുണ്ട്. നാരുകൾ അടങ്ങിയിട്ടുള്ളതിനാൽ ഈന്തപ്പഴം കഴിക്കുന്നത് ദഹനത്തിന് സഹായകരമാണ്. തന്മൂലം മലവിസർജ്ജനം മെച്ചപ്പെടുത്തും. ആരോഗ്യകരമായ ദഹനവ്യവസ്ഥയ്ക്കു ഈന്തപ്പഴം മികച്ചതാണ്. ഊർജ്ജം പ്രദാനം ചെയ്യുന്നവയാണ് ഈന്തപ്പഴം. അതുകൊണ്ടാണ് വ്യായാമത്തിന് തൊട്ടുമുമ്പ് ഈന്തപ്പഴം കഴിക്കുന്നത് നല്ലതാണെന്ന് പറയപ്പെടുന്നത്. കൊളസ്ട്രോളിന്റെ അളവ് കുറയ്ക്കാനും ഹൃദ്രോഗസാധ്യത കുറയ്ക്കാനും ഈന്തപ്പഴം സഹായകരമാണ്. ഈന്തപ്പഴത്തിലെ ആന്റി ഓക്സിഡന്റുകളാണ് ഇക്കാര്യത്തിൽ സഹായകമായി പ്രവർത്തിക്കുന്നത്. ഈന്തപ്പഴത്തിലുള്ള പൊട്ടാസ്യം തലച്ചോറിന്റെ ആരോഗ്യവും ഓർമ്മശക്തിയും മെച്ചപ്പെടുത്താൻ സഹായിക്കുന്നു. പ്രായവുമായി ബന്ധപ്പെട്ട പല പ്രശ്നങ്ങളും പരിഹരിക്കാനും ഉപകാരപ്പെടും. ഈന്തപ്പഴത്തിലുള്ള കാൽസ്യം ഫോസ്ഫറസ്, മഗ്നീഷ്യം എന്നിവ എല്ലുകളുടെ ആരോഗ്യം വർദ്ധിപ്പിക്കും. ഓസ്റ്റിയോപൊറോസിസിനുള്ള സാധ്യത ഗണ്യമായി കുറയ്ക്കാൻ ഇതുസഹായിക്കും.
ദിവസം മൂന്നുമുതൽ ആറുവരെ ഈന്തപ്പഴം കഴിക്കാവുന്നതാണ്. തണുപ്പുകാലത്ത് ഈന്തപ്പഴം ചേർത്ത ചെറുചൂടുപാൽ കുടിക്കുന്നത് നല്ലതാണ്. പ്രഭാതഭക്ഷണമായി ഓട്സോ ജ്യൂസോ ഉപയോഗിക്കുമ്പോൾ പഞ്ചസാരയ്ക്കു പകരം ഈന്തപ്പഴം ചേർക്കുക.
പഞ്ചസാരയ്ക്കു പകരമായി ഈന്തപ്പഴം ചേർത്ത് ലഡു പോലെയുള്ള പല മധുരപലഹാരങ്ങളും ഉണ്ടാക്കാവുന്നതാണ്.