അറിവ് ആർജ്ജിക്കാനും വർദ്ധിപ്പിക്കാനും ഇന്ന് എത്രയോ സാധ്യതകളാണ് ഉള്ളത്. ഗുരുമുഖത്തുനിന്ന് മാത്രം അറിവു നേടിയിരുന്ന നൂറ്റാണ്ടുകൾ അപ്രത്യക്ഷമായിരിക്കുന്നു. പാഠപുസ്തകങ്ങളായിരുന്നു പിന്നീടുള്ള ആശ്രയം. ഇന്ന് പാഠപുസ്തകങ്ങൾക്കപ്പുറത്തേക്ക് അറിവിന്റെ ലോകം വളർന്നിരിക്കുന്നു. എല്ലാവരും ഗുരുക്കന്മാരും വഴികാട്ടികളും ആയിത്തീരുന്ന അവസ്ഥ. അല്പം വാക്ക് സാമർത്ഥ്യവും കൃത്യതയോടെ കാര്യങ്ങൾ പറയാനുള്ള കഴിവുമുണ്ടെങ്കിൽ ആർക്കും ആരെയും സ്വാധീനിക്കാൻ കഴിയുന്ന സാഹചര്യം. പൊടിമീശ മുളയ്ക്കാത്ത പയ്യന്മാർ പോലും ഇന്ന് സോഷ്യൽ മീഡിയായിൽ വലിയവലിയ കാര്യങ്ങൾ പറയുന്നവരായി മാറിക്കഴിഞ്ഞിരിക്കുന്നു.
എല്ലാവരും ഒരൊറ്റവാശിയിലാണ്. മറ്റുള്ളവരെ നന്നാക്കിയേ തീരൂ. ആത്മീയവും ഭൗതികവും ശാരീരികവുമായി ഏതെല്ലാം രീതിയിലാണ് നമ്മെ അറിവുള്ളവരാക്കാൻ മറ്റുള്ളവർ ശ്രമിച്ചുകൊണ്ടിരിക്കുന്നത്! എന്തിനാണ് ഇതെല്ലാം? അറിവ് എപ്പോഴും സമ്പാദ്യവും നിക്ഷേപവും ആത്മവിശ്വാസവുമെല്ലാമാണ്. അറിവുള്ളവന് അധീശത്വമുണ്ട്. അധികാരമുണ്ട്. മറ്റുള്ളവരെ നിയന്ത്രിക്കാനും വരുതിയിലാക്കാനുമുള്ള കഴിവുണ്ട്. അറിവുള്ളവരോട് മറ്റുള്ളവർക്ക് ആദരവും സ്നേഹവുമുണ്ട്. പല പ്രശ്നങ്ങളുടെയും തീരുമാനങ്ങളുടെയും അവസാനവാക്ക് അറിവുളളവരായിരിക്കും. അതുകൊണ്ടാണ് അറിവുള്ളവരാകാൻ പലരും ശ്രമിക്കുന്നതും അറിവുള്ളവർ ആദരിക്കപ്പെടുന്നതും. ഇന്ന് അറിവിന്റെ ആകാശം വിശാലമായിരിക്കുന്നു. അറിവിനെക്കുറിച്ച് ഇങ്ങനെ പലതും പറയുമ്പോഴും ഒരു ചോദ്യം ബാക്കിയാവുന്നു.
എന്താണ് ഏറ്റവും വലിയ അറിവ്? അത് അവനവനെ അറിയുക എന്നതാണ്. ആ അറിവിനോളം വലുതല്ല മറ്റൊന്നും. സ്വയം അറിയാതെ പോകുന്നതുകൊണ്ടാണ് നാം ചിലപ്പോഴൊക്കെ തളർന്നുപോകുന്നതും പരാജയപ്പെട്ടുപോകുന്നതും. മറ്റുള്ളവരുടെ നാവിൻത്തുമ്പിലൂടെയാണ് പലപ്പോഴും നാം നമ്മെ അറിയാൻ ശ്രമിക്കുന്നത്. തന്മൂലം താരതമ്യങ്ങളും ഇകഴ്ത്തലുകളും നമ്മെ തകർക്കുന്നു. അവനവനെ അറിഞ്ഞവന് മറ്റൊന്നും പ്രശ്നമല്ല. അതുകൊണ്ട് ആദ്യം സ്വയം അറിയുക. എന്റെ സാധ്യതകൾ..പരിമിതികൾ.. ശക്തി.. ബലഹീനത.. വലുപ്പം..വലുപ്പക്കുറവ്.. ഓരോരുത്തരും സ്വയം ചോദിക്കേണ്ട, ഉത്തരം കണ്ടെത്തേണ്ട ഒന്നുണ്ട്. ഞാൻ എന്നെ എത്രത്തോളം അറിഞ്ഞിട്ടുണ്ട്,? മനസ്സിലാക്കിയിട്ടുണ്ട്?
സ്നേഹാദരങ്ങളോടെ
വിനായക് നിർമ്മൽ