ഓരോ ദുരന്തങ്ങളും മനുഷ്യ മനസുകളുടെ നന്മകളെ പുറത്തേക്ക് കൊണ്ടുവരാനുള്ള അവസരങ്ങളാണ്. കേരളത്തെ ദുരിതത്തിലാഴ്ത്തിയ രണ്ടു പ്രളയകാലത്തും മനുഷ്യന്, കൂടുതല് മാനവികനായും മാനുഷികനായും മാറിയതിന്റെ ജീവിക്കുന്ന സാക്ഷ്യങ്ങള് നാം നേരില് കണ്ടതാണ്. നിപ്പ വൈറസ് കാലത്തും രോഗികളുടെ ജീവന് പൊതിഞ്ഞുപിടിക്കാനുള്ള ശ്രമങ്ങളില് സ്വന്തം ജീവിതങ്ങള് ഹോമബലിയായി അര്പ്പിച്ച മനുഷ്യസ്നേഹികളെയും നാം കണ്ടു.
ഇപ്പോള് ദേശങ്ങളെന്നോ രാജ്യങ്ങളെന്നോ ഭേദമില്ലാതെ കോവിഡ് 19 പടര്ന്നുപിടിക്കുമ്പോഴും മനുഷ്യന് കൂടുതലായി മറ്റുള്ളവരെ സേവിക്കാനും സ്നേഹിക്കാനും സന്നദ്ധരായിക്കൊണ്ടിരിക്കുകയാണ്. പേഴ്സനല് പ്രൊട്ടക്ടീവ് എക്വുപ്പ്മെന്റ് എന്ന വസ്ത്രത്തിനുള്ളില് ഒതുങ്ങി തിരിച്ചറിയാന് കഴിയാത്തവിധത്തില് രോഗീശുശ്രൂഷകളിലേര്പ്പെട്ടിരിക്കുന്ന ആതുരപ്രവര്ത്തകര്.. രോഗവ്യാപന സാധ്യത കണക്കിലെടുത്ത് ഒറ്റയ്ക്ക് ഉണ്ടും ഉറങ്ങിയും കുടുംബങ്ങളില് നിന്ന് അകന്ന് ജീവിക്കുന്നവര്. നാളെ തങ്ങള്ക്ക് രോഗം പിടിപെടാന് സാധ്യതയുണ്ടായിരുന്നിട്ടും അതിനെ അവഗണിച്ച് മറ്റുളളവരുടെ ജീവനുകള്ക്ക് കാവല് നില്ക്കുന്നവര്. എത്ര നന്ദിയോടെയാണ്നാം അവരെയെല്ലാം ഓര്മ്മിക്കേണ്ടത്. അതുപോലെ പൊതുനിരത്തിലിറങ്ങി രോഗം പടര്ത്താതിരിക്കാന് മുന്കരുതലുകളും താക്കീതുകളുമായി നില്ക്കുന്ന പോലീസുദ്യോഗസ്ഥര്. പോലീസുകാരെക്കുറിച്ച് പല തെറ്റിദ്ധാരണകളുള്ളവര്ക്ക് പോലും ഇത്തവണ അവരുടെ സേവനങ്ങളെപ്രതി അവരെ സ്നേഹിക്കാതിരിക്കാനാവില്ല.
ഇങ്ങനെ ഓരോരുത്തരും ഓരോ രീതിയില് കോവീഡ് പ്രതിരോധത്തില് ഏര്പ്പെട്ടിരിക്കുമ്പോള് അങ്ങനെയൊന്നും ഭാഗഭാക്കാകാന് സാധിക്കാത്ത, എന്നാല് മനുഷ്യസ്നേഹം ഉള്ളിലുള്ളവര്ക്ക് നന്മ ചെയ്യാനുള്ള അവസരമായിരിക്കുകയാണ് ഗവണ്മെന്റ് തലത്തില് രൂപീകരിക്കുന്ന സന്നദ്ധം എന്ന യുവജനസംഘടന. 22 നും 40 നും ഇടയില് പ്രായമുള്ളവരെ ഉള്പ്പെടുത്തിയുള്ള സന്നദ്ധസേനയാണ് ഇത്. ലോക് ഡൗണും ഐസോലേഷനുമൊക്കെ വ്യാപകമാകുമ്പോള് ഭക്ഷണവും ഭക്ഷ്യവസ്തുക്കളുമെത്തിക്കുക, രോഗികളെ ആശുപത്രിയില് എത്തിക്കുക, ആശുപത്രിയില് കൂട്ടിരിക്കുക തുടങ്ങിയവയെല്ലാമാണ് ഈ സന്നദ്ധസംഘടനയില് നിന്ന് പ്രതീക്ഷിക്കുന്ന നന്മകള്. അണ്ണാന്കുഞ്ഞും തന്നാലായത് എന്ന മട്ടിലുള്ള തീരെ ചെറിയ സഹായങ്ങള്ക്കുപോലും വലിയ വിലയുണ്ടാകുന്ന കാലമാണ് ഇത്. മൊബൈലിനും ഇന്റര്നെറ്റിനും അവധി നല്കി യുവജനങ്ങള് ഉണര്ന്നെണീല്ക്കേണ്ട സമയമാണ് ഇത്.
കൊറോണയുടെ ദുരിതകാലത്തും കരിഞ്ചന്തയു പൂഴ്ത്തിവയ്പുമായി മനുഷ്യത്വം നഷ്ടപ്പെടുത്തിജീവിക്കുന്ന കച്ചവടക്കാരെ യുവജനങ്ങളുടെ ഈ നന്മ അമ്പരപ്പിക്കണം, ലജ്ജിപ്പിക്കണം. അതുകൊണ്ട് സന്നദ്ധം എന്ന വെബ്പോര്ട്ടല് വഴി ഓണ്ലൈനായി പേര് രജിസ്ട്രര് ചെയ്ത് എല്ലാ യുവജനങ്ങളും സമൂഹത്തോടും ഭരണകൂടത്തോടുമുള്ള അവരുടെ പ്രതിബദ്ധത തെളിയിക്കാനുള്ള അവസരമാക്കി ഇത് മാറ്റണം.ചലച്ചിത്രതാരങ്ങളായ ടൊവിനോയും സണ്ണി വെയ്നുംപോലെയുള്ളവര് ഇതില് അംഗങ്ങളായത് യുവജനങ്ങള്ക്ക് ഏറെ പ്രചോദനവും പ്രോത്സാഹനവുമാണ്. ആ മാതൃക സ്വീകരിച്ച് കൂടുതല് യുവജനങ്ങള് മുന്നോട്ടുവരട്ടെ. എല്ലാകാര്യങ്ങളിലും നമുക്ക് ഒപ്പമായിരിക്കാന് കഴിയണമെന്നില്ല. പക്ഷേ ആയിരിക്കുന്ന സാഹചര്യങ്ങളില് ആവതുപോലെ ഒപ്പമായിരിക്കാന്, സ്നേഹത്തിന്റെയും സേവനത്തിന്റെയും കരങ്ങള് ആവശ്യക്കാരനിലേക്ക് നീട്ടാന് ഏതൊരാള്ക്കും കഴിയുമെന്നാണ് തോന്നുന്നത്.
സന്നദ്ധം അത്തരമൊരു വിളിയാണ്. ഒപ്പമായിരിക്കാനും കൂടെ നടക്കാനുമുള്ള വിളി. സന്നദ്ധരായിരിക്കാനുള്ള വിളി. നമുക്ക് സന്നദ്ധരാകാം.