വേനലിന്റെ അനന്തരഫലം വരൾച്ച മാത്രമല്ല ചില രോഗങ്ങൾ കൂടിയാണ്. മഞ്ഞപ്പിത്തം, ചിക്കൻ പോക്സ്, ചെങ്കണ്ണ്, കോളറ എന്നിവയെല്ലാം വേനൽക്കാല രോഗങ്ങളുടെ പട്ടികയിലാണ് പെടുന്നത്. ഇതിൽ വേനൽക്കാലത്ത് ഏറ്റവും കൂടുതലായി കണ്ടുവരുന്ന ഒരു അസുഖമാണ് മഞ്ഞപ്പിത്തം. മഞ്ഞപ്പിത്തം കരളിനെയാണ് ബാധിക്കുന്നത്. വെള്ളത്തിലൂടെയും ആഹാരത്തിലൂടെയുമാണ് മഞ്ഞപ്പിത്തം പടരുന്നത്. പനി, ഛർദ്ദി, ക്ഷീണം, വിശപ്പില്ലായ്മ, തലകറക്കം, മൂത്രത്തിന് മഞ്ഞനിറം എന്നിവയാണ് ഇതിന്റെ പൊതു ലക്ഷണങ്ങൾ. മറ്റൊരു അസുഖമാണ് ചിക്കൻ പോക്സ്. വാരിസെല്ലാ സോസ്റ്റർ എന്ന വൈറസാണ് ചിക്കൻ പോക്സിന് കാരണം. പൊതുവെ അപകടകാരിയായ അസുഖമല്ല ഇത്. എന്നാൽ പ്രമേഹരോഗികളിലും മറ്റും അസുഖം വന്നാൽ പ്രത്യേക ശ്രദ്ധ കൊടുക്കുകയും വേണം.
കണ്ണിന് ചൂടും പൊടിയുമേല്ക്കുന്നതു വഴിയുണ്ടാകുന്ന രോഗമാണ് ചെങ്കണ്ണ്. കണ്ണിന് ചുവപ്പുനിറം ഉണ്ടാവുക,ചൊറിച്ചിൽ, കൺപോളകൾ തടിക്കുക, കണ്ണിൽ നിന്നും വെള്ളം വരിക എന്നിവയാണ് ചെങ്കണ്ണിന്റെ പൊതു ലക്ഷണങ്ങൾ.
വേനൽക്കാലരോഗങ്ങളിൽ മഞ്ഞപ്പിത്തം പോലെ തന്നെ അപകടകാരിയായ അസുഖമാണ് കോളറ. വൃത്തിയില്ലാത്ത വെള്ളം, ആഹാരം എന്നിവ വഴിയാണ് കോളറ പിടിപെടുന്നത്. വയറിളക്കം, ഛർദ്ദി, പനി, മലത്തിൽ രക്തത്തിന്റെ അംശം കാണുക എന്നിവയാണ് രോഗലക്ഷണങ്ങൾ. ആരോഗ്യമുള്ള ആളെ പോലും മണിക്കൂറുകൾക്കകം അവശനാക്കാനും പിന്നീട് മരണത്തിന് വരെ കാരണമാകുകയും ചെയ്യും. ശുചിത്വം, ആരോഗ്യകരമായ ഭക്ഷണശീലം എന്നിവവഴി ഈ വേനൽക്കാല രോഗങ്ങളെ നമുക്ക് പുറത്താക്കാൻ കഴിയും. ആഹാരസാധനങ്ങൾ അടച്ചുസൂക്ഷിക്കുക, തിളപ്പിച്ചാറിയ വെള്ളം മാത്രം ഉപയോഗിക്കുക എന്നിവയെല്ലാം ഇക്കാര്യത്തിൽ പ്രധാനപങ്കുവഹിക്കുന്നു.
ഇതിനൊക്കെ പുറമെ നിർജ്ജലീകരണം, സൂര്യാഘാതം, ഉഷ്ണാഘാതം തുടങ്ങിയ രോഗങ്ങളും പിടിപെടാം. അമിതമായി സൂര്യപ്രകാശം നേരിടേണ്ടിവരുന്നതുകൊണ്ടാണ് ഇവ സംഭവിക്കുന്നത്. ശരീരതളർച്ച, ക്ഷീണം, തലവേദന, മയക്കം തുടങ്ങിയവയെല്ലാം അനുഭവപ്പെട്ടേക്കാം.
വേനൽക്കാലത്തെ മറ്റൊരു വില്ലൻ ചൂടുകുരുവാണ്. അമിതവിയർപ്പ് മൂലം ഗ്രന്ഥികളിൽ അഴുക്ക് അടിഞ്ഞുകൂടി രോഗാണുക്കൾ പെരുകുന്നതുമൂലം തൊലിപ്പുറം തിണർത്ത് പൊന്തി കുരുക്കളായി രൂപപ്പെടുന്നതാണ് ഇത്. പ്രത്യേകമായ ചികിത്സവേണ്ടെങ്കിലും പഴുത്ത് വേദനകൂടിയാൽ ഡോക്ടറെ കാണേണ്ടതാവശ്യമാണ്.
വെയിൽ കൊള്ളാതിരിക്കുക, കുട ഉപയോഗിക്കുക, ധാരാളംവെള്ളം കുടിക്കുക, തൊപ്പി, കോട്ടൺ വസ്ത്രങ്ങൾ എന്നിവ ഉപയോഗിക്കുക ഇവയെല്ലാം സൂര്യപ്രകാശം നേരിടുന്നവഴിയുണ്ടാകുന്ന അസുഖങ്ങളെ കുറയ്ക്കാൻ സഹായകമാണ്.