പ്രതീക്ഷകൾ ഇല്ലാത്ത ജീവിതം എത്രയോ വിരസമായിരിക്കും. ജീവിതത്തെ മുന്നോട്ടുകൊണ്ടുപോകുന്നത് പ്രതീക്ഷകളാണ്. അതില്ലെങ്കിൽ ജീവിതത്തിന്റെ പ്രസക്തി നഷ്ടമാകും. പ്രസരിപ്പ് ചോർന്നുപോകും. നഷ്ടപ്പെട്ടുപോയ പ്രതീക്ഷകളെ തിരിച്ചുപിടിക്കാനുള്ളതാണ് ഓരോ നിമിഷങ്ങളും ഓരോ മണിക്കൂറുകളും ഓരോ ദിവസങ്ങളും. പലതരത്തിലുള്ള അനുഭവങ്ങളും സാഹചര്യങ്ങളും വ്യക്തികളും നമ്മുടെ പ്രതീക്ഷകളെയും സ്വപ്നങ്ങളെയും ഞെരുക്കിക്കളയാനുള്ള സാധ്യതകളേറെയാണ്. അവയ്ക്ക് കീഴ്പ്പെട്ടുപോയാൽ പിന്നെയൊരു ഉയിർത്തെന്നേൽപ്പ് ദുഷ്ക്കരമായിരിക്കും. അതുകൊണ്ട് പ്രതീക്ഷകളെയും സ്വപ്നങ്ങളെയും ചവിട്ടിയരയ്ക്കാൻ നാം മറ്റൊരാൾക്ക് അവസരം കൊടുക്കരുത്. അവർ ചവിട്ടിക്കൊള്ളട്ടെ അതവരുടെ സഹജവാസന.
പക്ഷേ, ആ കാലടികളിൽ നിന്ന് മാറി നിൽ ക്കാനുള്ള ധീരതയും വിവേകവും നാം കാണിക്കണം. നമ്മുടെ സ്വപ്നങ്ങൾ നമുക്ക് വലുതാണ്, പ്രതീക്ഷകളും. പ്രതീക്ഷകൾക്കൊപ്പം നമുക്ക് സഞ്ചരിക്കാം. സ്വപ്നങ്ങൾക്കൊപ്പം യാത്ര തുടരാം.
ഒപ്പം പ്രതീക്ഷകൾക്കൊപ്പം…
സ്വപ്നങ്ങൾക്കൊപ്പം…