ദാമ്പത്യം ഊഷ്മളമാക്കാൻ ആറു കാര്യങ്ങൾ

വിവാഹം കഴിക്കുന്നത് താരതമ്യേന എളുപ്പമാണെങ്കിലും ദമ്പതികളെന്ന നിലയിൽ ജീവിതം മുന്നോട്ടുകൊണ്ടുപോകുന്നത് അത്ര എളുപ്പമല്ല. പരസ്പരം താങ്ങായും തണലായും നിന്നാൽ മാത്രമേ അസ്വാരസ്യങ്ങളില്ലാതെ ദാമ്പത്യജീവിതം മുന്നോട്ടുകൊണ്ടുപോകാൻ കഴിയൂ. പരസ്പരം കൊടുക്കേണ്ട മുൻഗണനകൾ കാലം മുന്നോട്ടുപോകും തോറും വിസ്മരിച്ചുപോകുന്നു എന്നതാണ് യാഥാർത്ഥ്യം. ജോലി, മക്കൾ, സുഹൃത്തുക്കൾ, മാതാപിതാക്കൾ എന്നിങ്ങനെ പലതും മുൻഗണനകളായി ഇടയ്ക്ക് കയറുമ്പോൾ ദമ്പതികൾക്കിടയിലുള്ള പരസ്പര സ്‌നേ ഹത്തിനും ഐക്യത്തിനും ചോർച്ച സംഭവിക്കുന്നു. അതൊഴിവാക്കാനും പരസ്പരം ശ്രദ്ധിക്കാനും ചില കാര്യങ്ങൾ അറിഞ്ഞിരിക്കുന്നത് നല്ലതായിരിക്കും.

എല്ലാ ദിവസവും തങ്ങളുടെ വികാരങ്ങളും വിചാരങ്ങളും ദമ്പതികൾ പങ്കുവയ്ക്കണം. അത്താഴത്തിന് ശേഷം ഇതിനുള്ള സമയം കണ്ടെത്തുന്നതായിരിക്കും ഉചിതം. പറയുന്നത് പരസ്പരം ശ്രദ്ധിക്കുകയും വേണം.

നീണ്ടുനില്ക്കുന്ന ജോലിയെത്തുടർന്ന് രണ്ടുപേരും ക്ഷീണിച്ചായിരിക്കും വീട്ടിലെത്തിച്ചേരുന്നത്. ആരാണ് കൂടുതൽ കഷ്ടപ്പെട്ടതെന്നോ ആരാണ് കുടുംബത്തിന് വേണ്ടി കൂടുതൽ ബുദ്ധിമുട്ടിയത് എന്നോ തർക്കങ്ങൾ വേണ്ട. ജോലിസ്ഥലത്തെ ബാഡ് മൂഡുകൾ ഉപേക്ഷിച്ച് കുടുംബത്തിന്റെ സന്തോഷത്തിലേക്ക് പ്രവേശിക്കുക.

കുടുംബത്തിലേക്ക് പലപ്പോഴും പ്രതിസന്ധികൾ കടന്നുവരാറുണ്ട്; സംഘർഷങ്ങളും. എന്നാൽ അവയെ നെഗറ്റീവായി കാണാതെ പോസിറ്റീവായി പരിഹരിക്കാനും ക്രിയാത്മകമായ പരിഹാരമാർഗ്ഗങ്ങൾ കണ്ടെത്താനും ശ്രമിക്കുക. ഒരുമിച്ചു ചിന്തിക്കുമ്പോൾ നല്ലൊരു പരിഹാരമാർഗ്ഗം കണ്ടെത്താൻ സാധിക്കും.

വീട്ടിലേക്ക് കയറിച്ചെല്ലുന്നതും വരുന്ന ആളെ സ്വീകരിക്കുന്നതും മുഖം വീർപ്പിച്ചായിരിക്കരുത്. സന്തോഷത്തോടെ വീട്ടിലേക്ക് കയറുക, സന്തോഷത്തോടെ പങ്കാളിയെ സ്വീകരിക്കുക, ദയാപുരസരമായ വാക്കുകൾ സംസാരിക്കുക, ഒന്ന് ആലിംഗനം ചെയ്യുക.

കാര്യങ്ങൾക്ക് കൃത്യതയുണ്ടെങ്കിൽ അത് എക്സിക്യൂട്ട് ചെയ്യാൻ വളരെ എളുപ്പമായിരിക്കും. ഷോപ്പിംഗിന് പോകുമ്പോൾ കൃത്യമായ ലിസ്റ്റ് ഒരുമിച്ച് തയ്യാറാക്കുക.  കുട്ടികളെ അവരുടെ പ്രായമനുസരിച്ച് ചെയ്യാനുള്ള കാര്യങ്ങൾ ഏല്പിക്കുക.

പുതിയതായി ഒരു കാർ വാങ്ങണോ, അവധിക്കാലത്ത് ടൂർ എവിടേയ്ക്ക് നടത്തണം, അമ്മായിയമ്മയെ വീട്ടിലേക്ക് സ്ഥിരമായി കൊണ്ടുവന്നു നിർത്തണോ തുടങ്ങി എല്ലാകാര്യങ്ങളും ആലോചിച്ച് തീരുമാനത്തിലെത്തുക.  കൂടിയാലോചിച്ചു തീരുമാനിക്കുന്നതുകൊണ്ട് പിന്നീട് പരസ്പരം കുറ്റപ്പെടുത്താനുള്ള അവസരമില്ലാതെയുമാകും.