വില കൂടിയ തുണികള്‍ വാങ്ങിയാല്‍ മാത്രം പോര, അവ നന്നായി സൂക്ഷിക്കുകയും വേണം. ഇതാ തുണികളുടെ ആയുസ് കൂട്ടാന്‍ ചില വഴികള്‍:-
- റയോണ്‍സ്, സില്‍ക്ക്, ലേയ്സ്, നെറ്റ്, കമ്പിളി തുടങ്ങി നേര്‍ത്ത തുണിത്തരങ്ങള്‍ ഇളംചൂടുവെള്ളത്തില്‍ കഴുകുക. തിരുമ്മുകയോ, പിഴിയുകയോ ചെയ്യരുത്.
- പഴയ പട്ടുസാരികള്‍ വീട്ടില്‍തന്നെ സ്റ്റിഫ്‌ ആക്കാം. സാരി കഴുകിയശേഷം അര ബക്കറ്റ് തണുത്ത വെള്ളത്തില്‍ ഒരു ടീസ്പൂണ്‍ സാധാരണം പശ ചേര്‍ത്ത് മുക്കി വെയ്ക്കുക. സ്റ്റാര്‍ച് മുക്കുമ്പോള്‍ പട്ടുസാരികള്‍ക്ക് ഉണ്ടാകുന്ന മങ്ങിയ ലുക്ക് ഇതുണ്ടാക്കില്ല.
- കടുംനിറമുള്ള തുണിത്തരങ്ങള്‍ സ്റ്റാര്‍ച് ചെയ്യുമ്പോള്‍ അവ തിരിച്ചിട്ട ശേഷം മാത്രം ചെയ്യുക. ഇത് തുണിയുടെ നല്ല വശത്ത് വരകളും മറ്റും വീഴുന്നത് തടയും.
- തുണി മുക്കി വെയ്ക്കുന്ന വെള്ളത്തില്‍ ഒരു പിടി ഉപ്പിടുക. ഇത് നിറം ഇളകുന്നത് തടയും. അര ബക്കറ്റ് വെള്ളത്തില്‍ ഒരു ടേബിള്‍ സ്പൂണ്‍ വിനാഗിരി ചേര്‍ക്കുന്നതും നല്ലതാണ്.
- വാങ്ങിയ തുണി ആദ്യമായി കഴുകുമ്പോള്‍ അവയുടെ ചെറിയൊരു ഭാഗം മാത്രം കഴുകുക. ഇത് ഉണങ്ങുമ്പോള്‍ കഴുകാത്ത ഭാഗവുമായി വെച്ച് നിറം ഇളകുന്നതാണോ എന്ന് നോക്കുക. എളുപ്പത്തില്‍ നിറം ഇളകുന്ന തുണികള്‍ ഡ്രൈക്ലീനിംഗിനു നല്‍കുന്നതാണ് ഉചിതം.
- പൊടി പിടിച്ചതും, കറ പുരണ്ടതുമായ അടുക്കളത്തുണികള്‍ വൃത്തിയാക്കാന്‍ ആദ്യം സോപ്പും, വാഷിംഗ് സോഡയും ചേര്‍ത്ത് വെള്ളം തിളപ്പിക്കുക. തീ കുറച്ച ശേഷം അതില്‍ അല്പം പാരഫിന്‍ ചേര്‍ത്ത് തുണി അതില്‍ മുക്കി മുപ്പത് മിനിറ്റ് തിളപ്പിക്കുക.
- സിന്തറ്റിക് തുണിത്തരങ്ങള്‍ കൃത്രിമചൂടിലും നേരിട്ടുള്ള സൂര്യപ്രകാശത്തിലും ഇട്ടുണക്കരുത്. അവ ഞെക്കിപ്പിഴിയുകയോ, പിരിക്കുകയോ ചെയ്യരുത്.
- സൂര്യപ്രകാശം തുണിയെ ദുര്‍ബ്ബലമാക്കുകയും, മങ്ങിക്കുകയും ചെയ്യും. അതിനാല്‍ ഏറെനേരം തുണികള്‍ വെയിലത്ത് ഇടരുത്. അവ ശരിക്കുണങ്ങുന്നതിനു മുമ്പ് തേയ്ക്കാന്‍ എളുപ്പമാണ്.
- നിറമുള്ള തുണികള്‍ തിരിച്ചിട്ടുണക്കുന്നത് നിറം മങ്ങുന്നത് തടയും.
- നനഞ്ഞ തുണികള്‍ ഇടാന്‍ പ്ലാസ്റ്റിക് കോട്ടിംഗ് ഉള്ളതോ, അലുമിനിയമോ ആയ ഹാങ്ങറുകള്‍ ഉപയോഗിക്കുക. തടി കൊണ്ടുള്ള ഹംഗറുകള്‍ പലപ്പോഴും കഴുകിയാല്‍ മാറാത്ത കറകള്‍ ഉണ്ടാക്കും.