കടുത്ത ചൂടില് വെന്തുരുകുകയാണ് കേരളം. പുറത്തേക്കിറങ്ങാന് പോലും കഴിയാത്തത്ര ചൂട്. അതിന് പുറമെ ശുദ്ധജലത്തിന്റെ അഭാവവും. പലസ്ഥലങ്ങളും കുടിവെള്ള ക്ഷാമത്തിലേക്ക് കൂപ്പുകുത്തിക്കഴിഞ്ഞു.
മുന്വര്ഷങ്ങളില് വരള്ച്ച അനുഭവപ്പെടാത്ത മേഖലകള് പോലും വരണ്ടുണങ്ങി. കിണറുകള് വറ്റിവരണ്ടു. ഒരുകാലത്ത് ജല സമ്പന്നതയുടെ പേരില് അഭിമാനിച്ചിരുന്ന നമ്മുടെ നാട് കടുത്ത ജലദൗര്ലഭ്യമാണ് നേരിട്ടുകൊണ്ടിരിക്കുന്നത് എന്നത് നടുക്കമുളവാക്കുന്ന യാഥാര്ത്ഥ്യം തന്നെ.
ജലസ്രോതസുകള് മലിനപ്പെടുത്തിയതും അവയോട് അനാദരവ് കാണിക്കുന്നതുമാണ് ഇത്തരമൊരു പ്രതിസന്ധിക്ക് കാരണമായിരിക്കുന്നതെന്ന് നമുക്ക് നിഷേധിക്കാനാവില്ല. ഓരോ ജലസ്രോതസും മലിനപ്പെടുത്തിയതില് നമ്മളോരോരുത്തരും ചെറുതും വലുതുമായ പങ്കു വഹിച്ചിട്ടുണ്ട്. പാരിസ്ഥിതികമായ ചൂഷണവും പ്ലാസ്റ്റിക് മാലിന്യങ്ങളുടെ വലിച്ചെറിയലും മുതല് ഒരുപാട് കാരണങ്ങള് അതിനു പിന്നിലുണ്ട്. ജലമാണ് ജീവന്റെ നിലനില്പ്. പുല്ക്കൊടിത്തുമ്പു മുതല് മനുഷ്യന് വരെ നിലനിന്നുപോരുന്ന ആവാസവ്യവസ്ഥയില് ജലത്തിന്റെ പ്രാധാന്യം ആര്ക്കും നിഷേധിക്കാനാവില്ല. പ്രപഞ്ചത്തില് ആദ്യമായി ജീവനുണ്ടായത് വെള്ളത്തിലാണെന്നതാണ് മതവിശ്വാസങ്ങള്. എന്നിരിക്കിലും ആവശ്യം നിര്വഹിച്ചുകഴിയുമ്പോള് അതിന്റെ പ്രാധാന്യം മറന്നുപോകുന്നവരാണ് നമ്മളെല്ലാവരും.
ദാഹിച്ചു വരണ്ടുവരുമ്പോള് ഒരു ഗ്ലാസ് വെള്ളത്തിന് വല്ലാത്ത രുചിയുണ്ട്. എന്നാല് തണലത്തിരിക്കുമ്പോള് വെള്ളത്തെക്കുറിച്ച് നാം ചിന്തിക്കുന്നതുപോലുമില്ല. പണം പോലെ ആവശ്യത്തിന് മാത്രം ഉപയോഗിക്കേണ്ടതാണ് വെള്ളമെന്ന പാഠങ്ങള് വീടുകളില് നിന്ന് തന്നെ കുട്ടികള്ക്ക് നാം പഠിപ്പിച്ചുകൊടുക്കണം.
ഇക്കാര്യത്തില് അമ്മമാര്ക്ക് പ്രത്യേക പങ്കുണ്ട് എന്നതാണ് വിശ്വാസം. നമ്മുടെ ഒട്ടുമിക്ക വീടുകളിലും കണ്ടുവരുന്ന ഒരു രീതി ടാപ്പ് തുറന്നുവച്ച് അടുക്കളയില് പാത്രം കഴുകുന്ന രീതിയാണ്. വാഷ്ബെയ്സിന്റെ ടാപ്പുതുറന്നുവച്ച് വായും മുഖവും കഴുകുന്ന രീതിയാണ്. ഇതിലൂടെ ആവശ്യത്തില് കൂടുതല് വെള്ളമാണ് പാഴാക്കിക്കളയുന്നത്. പണ്ടുകാലങ്ങളില് ഇതായിരുന്നില്ല രീതി. പ്രത്യേകിച്ച് വേനല്ക്കാലങ്ങളില്. ഒരു കപ്പ് വെള്ളത്തില് ഒതുക്കിനിര്ത്തേണ്ട കാര്യങ്ങളാണ് ഒരുബക്കറ്റ് വെള്ളത്തിലേക്ക് പുതുതലമുറ എത്തിച്ചിരിക്കുന്നത്്. അതിന് അവരെ കുറ്റം പറയേണ്ട കാര്യമില്ല. കാരണം നാം ചെയ്തുകാണിക്കുന്നത് അതാണ്.
അതുകൊണ്ട് ജലം പരിമിതമായി ഉപയോഗിക്കേണ്ടതിന്റെ പാഠങ്ങള് നാം വീടുകളില് നിന്ന് തുടങ്ങണം. അടുക്കളയില് തുടങ്ങുകയും കാണിച്ചുകൊടുക്കുകയും ചെയ്യേണ്ട ജല പരിമിത ഉപയോഗത്തിന്റെ പാഠങ്ങളേ ഭാവിതലമുറയെ വെള്ളത്തോടുള്ള മിതത്വം പാലിക്കാന് പ്രേരിപ്പിക്കുകയുള്ളൂ. അല്ലെങ്കില് അവര് വളരെ വലിയ ധൂര്ത്തന്മാരായി പോകും. വെള്ളത്തിന്റെ ധൂര്ത്തന്മാര്. വരും കാലത്ത് ഏറ്റവും വലിയ യുദ്ധം നടക്കാന് പോകുന്നത് വെള്ളത്തിന് വേണ്ടിയാണെന്ന ചില മുന്നറിയിപ്പുകള് കൂടിയുണ്ട് .
അതുപോലെ ഈ നൂറ്റാണ്ടിന്റെ മധ്യത്തോടെ ശുദ്ധജല ആവശ്യം ഇപ്പോഴത്തെതിന്റെ ഇരട്ടിയാകുമമെന്നും എന്നാല് ജലപരിപോഷണത്തില് കേരളം ഏറെ പി്ന്നിലാണെന്ന കാര്യവും അറിഞ്ഞിരിക്കുന്നത് നന്ന്. പല കുടിവെള്ള പദ്്ധതികളും പാതിവഴിയില് നിലച്ചുപോയിരിക്കുന്ന അവസ്ഥയാണ് നമുക്ക് മുമ്പിലുള്ളത്. അവയെ പുനരുജ്ജീവിപ്പിക്കുകയും വര്ഷകാലത്തെ മഴവെള്ളം ഗുണപ്രദമായി ശേഖരിക്കാന് കഴിയുന്ന പദ്ധതികള് ആവിഷ്ക്കരിക്കുകയും ചെയ്താല് നാം ഇന്ന് നേരിടുന്ന ശുദ്ധജലദൗര്ലഭ്യത്തിന് വലിയൊരു പരിധിവരെ പരിഹാരം കണ്ടെത്താന് കഴിയും.
നാടും വീടും ഒത്തുചേര്ന്നുള്ള കൈകോര്ക്കലുകളിലൂടെ വരുംകാലങ്ങളില് നാം ജലസ്വയംപര്യാപ്തത കൈവരിച്ചാല് അതുതന്നെയാകും വരും തലമുറയ്ക്ക് നമുക്ക് നല്കാന് കഴിയുന്ന വലിയ നന്മകളിലൊന്ന്. ഏറ്റവും വലിയ സന്പാദ്യവും.