ചെറിയ കുട്ടികളെ വീട്ടുജോലികളില്‍ പങ്കെടുപ്പിക്കുന്നതുവഴി അവരില്‍ ആത്മവിശ്വാസവും, ചുമതലാബോധവും വളര്‍ത്താം. മാത്രമല്ല, അമ്മമാരുടെ ജോലിഭാരം കുറയ്ക്കുന്നതിനും ഇത് സഹായിക്കും. വീട്ടില്‍ കുട്ടികള്‍ക്ക് നല്‍കാവുന്ന ചില ജോലികള്‍ ഇവയാണ്:-
- ഉണര്‍ന്നു എഴുന്നേല്‍ക്കുമ്പോള്‍തന്നെ കിടക്കവിരികള്‍ ചുളിവു നിവര്‍ത്തിയിടുന്നതിനും, പുതപ്പുകള്‍ യഥാസ്ഥാനത്ത് മടക്കി വെയ്ക്കുന്നതിനും പരിശീലിപ്പിക്കുക.
- സ്വന്തം വസ്ത്രങ്ങളും, കളിപ്പാട്ടങ്ങളും, പുസ്തകങ്ങളും അടുക്കി വെയ്ക്കാനും, കുട്ടികളോട് ആവശ്യപ്പെടാം.
- വീട് ശുചിയാക്കാനും, ചെടികള്‍ നനയ്ക്കുവാനും കുട്ടികളെ ഒപ്പം കൂട്ടാവുന്നതാണ്. വളര്‍ത്തുമൃഗങ്ങള്‍ക്ക് ഭക്ഷണം നല്‍കുന്നതിനു കുട്ടിയെ പരിശീലിപ്പിക്കാം.
- വിരുന്നുമേശ ഒരുക്കുമ്പോഴും, ഭക്ഷണത്തിനുശേഷം മേശ വൃത്തിയാക്കുമ്പോഴും കുട്ടിയുടെ സഹായം ആവശ്യപ്പെടാം.
- ഇങ്ങനെയുള്ള കാര്യങ്ങളില്‍ പരിശീലനം നല്‍കുമ്പോള്‍ അമ്മമാര്‍ ശ്രദ്ധിക്കേണ്ട ചില കാര്യങ്ങളുണ്ട്:-
- ഒരു തവണ ചെയ്തതുകൊണ്ട് മാത്രം കുട്ടി ആ ജോലി പഠിക്കണം എന്നില്ല. ഒരു ജോലി എങ്ങനെ വ്യക്തമായി ചെയ്യാമെന്ന് കുട്ടിക്ക് മനസ്സിലാക്കി കൊടുത്ത ശേഷം മാത്രം പരിശീലിപ്പിക്കുക.
- ഏല്‍പ്പിച്ച ജോലി ചെയ്തു തീര്‍ക്കുന്നതുവരെയും കുട്ടിയെ നിരീക്ഷിക്കരുത്. ജോലി പൂര്‍ത്തിയായശേഷം മാത്രം അമ്മമാര്‍ ഇടപെട്ടാല്‍ മതിയാകും.
- ഭാരമേറിയ ജോലികള്‍ പലതായി ഭാഗിച്ചശേഷം മാത്രം കുട്ടികളെ ഏല്‍പ്പിക്കുക.
- സ്ക്കൂളില്‍ പോകുന്നതിനു മുമ്പും, തിരിച്ചു വന്ന ശേഷവും ചെയ്യേണ്ട ജോലികളും, അവധി ദിവസങ്ങളില്‍ ചെയ്യേണ്ട ജോലികളും തരംതിരിച്ചു നല്‍കണം.
- ആണ്‍കുട്ടികള്‍ക്കും, പെണ്‍കുട്ടികള്‍ക്കും ജോലികള്‍ തുല്യമായി വീതിച്ചു നല്‍കാന്‍ ശ്രദ്ധിക്കണം.
- കുട്ടി പൂര്‍ത്തിയാക്കിയ ജോലി അമ്മ ഉടന്‍തന്നെ തിരുത്തി ചെയ്യാതിരിക്കാന്‍ ശ്രദ്ധിക്കുക. അത് അവരുടെ ആത്മവിശ്വാസം കെടുത്തും.
- ജോലികള്‍ ഭംഗിയായി പൂര്‍ത്തിയാക്കിയാല്‍ കുട്ടികള്‍ക്ക് അവര്‍ക്ക് ഇഷ്ടമുള്ള ചെറിയ സമ്മാനങ്ങള്‍ നല്‍കാം.