കുട്ടികളെ സ്ഥിരമായി ശകാരിക്കുകയും അടിക്കുകയും ഭീഷണിപ്പെടുത്തുകയും ചെയ്യുന്ന ‘harsh parenting’ അവരുടെ മാനസിക സമ്മർദ്ദം നിയന്ത്രിക്കുന്ന കഴിവിനെ ദുർബലപ്പെടുത്തുമെന്ന് പുതിയ പഠനങ്ങൾ വ്യക്തമാക്കുന്നു. കുട്ടികൾ വളരുന്നതിനൊപ്പം സ്വയം ശാന്തരാകാനും സമ്മർദ്ദസാഹചര്യങ്ങളിൽ വികാരങ്ങളെ നിയന്ത്രിക്കാനുമുള്ള കഴിവ് വികസിക്കേണ്ടതാണ്. എന്നാൽ കഠിനമായ മാതാപിതൃപരിപാലനം ഈ സ്വാഭാവിക വളർച്ചയെ തടസ്സപ്പെടുത്തുകയാണ് ചെയ്യുന്നത്.
അമേരിക്കയിലെ Penn State Universtiy ഗവേഷകർ നടത്തിയ പഠനത്തിൽ, സ്ഥിരമായ ദേഷ്യപ്പെടൽ, ഭീഷണി, ശാരീരിക ശിക്ഷ തുടങ്ങിയവ നേരിടുന്ന കുട്ടികൾക്ക് സമ്മർദ്ദം നിയന്ത്രിക്കുന്ന ശേഷി കുറവായിരിക്കും. സാധാരണയായി ഒരു കുഞ്ഞ് ചെറിയ പ്രായത്തിൽ മാതാപിതാക്കളിൽ നിന്ന് മാനസിക ആശ്വാസം തേടും. പിന്നീട് പ്രായം കൂടുന്തോറും സ്വയം വികാരങ്ങളെ നിയന്ത്രിക്കാൻ പഠിക്കും. പക്ഷേ മക്കളോട് കഠിനമായി പെരുമാറുന്ന മാതാപിതാക്കന്മാരുടെ കുട്ടികൾക്ക് ഈ മാറ്റം ശരിയായി സംഭവിക്കാറില്ല.
അവർ കൂടുതൽ ആശ്രിതരായും കൂടുതൽ ഉത്കണ്ഠാകുലരായും ജീവിക്കുന്നു. നല്ലതാകാൻ വേണ്ടിയല്ലേ, നന്നാകാൻ വേണ്ടിയല്ലേ ശിക്ഷയും ദേഷ്യപ്പെടലും എന്നാണ് ഒട്ടുമിക്ക മാതാപിതാക്കന്മാരുടെയും പ്രതികരണം. പക്ഷേ അവർ കരുതുന്നതിനെക്കാൾ ദോഷങ്ങൾ മാത്രമേ അതുകൊണ്ട് സംഭവിക്കുകയുള്ളൂ.
ഗവേഷകർ പറയുന്നതനുസരിച്ച്, മാതാപിതാക്കളുടെ ശാന്തവും കരുതലുള്ളതുമായ പ്രതികരണങ്ങളാണ് കുട്ടികളെ സുരക്ഷിതമാക്കുന്നത്. ഒരു കുഞ്ഞ് ഭയപ്പെടുമ്പോൾ അല്ലെങ്കിൽ വിഷമിക്കുമ്പോൾ മാതാപിതാക്കൾ ക്ഷമയോടെ പ്രതികരിച്ചാൽ, കുട്ടിയുടെ ശരീരവും മനസ്സും ക്രമേണ സമ്മർദ്ദത്തെ കൈകാര്യം ചെയ്യാൻ പഠിക്കുന്നു. എന്നാൽ നിരന്തരമായ ശകാരവും കോപവും കുട്ടിയുടെ മസ്തിഷ്കത്തെ ‘ഭീഷണിയുടെ അവസ്ഥയിൽ’ നിലനിർത്താൻ ഇടയാക്കുന്നു.
പല പഠനങ്ങളും harsh parenting കുട്ടികളിൽ ആക്രമണ സ്വഭാവം, ആശങ്ക, വിഷാദം, ശ്രദ്ധക്കുറവ്, ആത്മവിശ്വാസക്കുറവ് എന്നിവ വർധിപ്പിക്കുമെന്ന് കണ്ടെത്തിയിട്ടുണ്ട്. കുട്ടികൾക്ക് സ്വന്തം വികാരങ്ങൾ മനസ്സിലാക്കാനും നിയന്ത്രിക്കാനും ബുദ്ധിമുട്ടുണ്ടാകാം. മസ്തിഷ്കവുമായി ബന്ധപ്പെട്ട പഠനങ്ങൾ പോലും കഠിനമായ പേരന്റിംങ് കുട്ടികളുടെ വികാരനിയന്ത്രണവുമായി ബന്ധപ്പെട്ട ഭാഗങ്ങളുടെ വളർച്ചയെ ബാധിക്കാമെന്ന് സൂചിപ്പിക്കുന്നു. പ്രത്യേകിച്ച് ഭയം, വികാരം, തീരുമാനമെടുക്കൽ എന്നിവയുമായി ബന്ധപ്പെട്ട മസ്തിഷ്കഭാഗങ്ങളിൽ മാറ്റങ്ങൾ കാണപ്പെട്ടതായി ചില ഗവേഷണങ്ങൾ പറയുന്നു.
കുട്ടികളെ ശാസിക്കുന്നത് മുഴുവൻ തെറ്റല്ലെങ്കിലും ഭയപ്പെടുത്തലും അപമാനവും സ്ഥിരമായ കോപവും ഉപയോഗിക്കുന്ന രീതികൾ ദീർഘകാലത്തിൽ ദോഷകരമാണ്. അതിന് പകരം വ്യക്തമായ പരിധികളും സ്നേഹപൂർവമായ നിയന്ത്രണവുമാണ് കുട്ടികളുടെ മാനസികാരോഗ്യത്തിന് കൂടുതൽ സഹായകരം.