ജീവിതത്തില് സൗഹൃദങ്ങള് വളരെ ആവശ്യമാണ്. വീട്ടുകാരോടും, കുടുംബാംഗങ്ങളോടും തുറന്നു പറയാന് പറ്റാത്ത പലതും കൂട്ടുകാരോട് പങ്കു വെയ്ക്കാന് സാധിക്കും. ഒരേ ചിന്താഗതിയുള്ളവര് ആണ് സുഹൃത്തുക്കള് എങ്കില് ആ സൗഹൃദങ്ങള് എക്കാലവും നിലനില്ക്കുകതന്നെ ചെയ്യും.
സന്തോഷത്തിലും, സങ്കടത്തിലും കൈവിടാത്ത, ചൂഷണം ചെയ്യാത്ത സുഹൃത്ത്. ഏത് ജീവിതച്ചൂടിലും ചെന്നിരിക്കാനുള്ള ചങ്ങാതിതണല്. അത് നിങ്ങളുടെ ഏറ്റവും വലിയ ഫിക്സഡ് ഡെപ്പോസിറ്റ് തന്നെയാണ്.
സൗഹൃദത്തെക്കുറിച്ച് അമേരിക്കന് ചിന്തകന് ഡിക്സി വിത്സണ് പറഞ്ഞത് ഇപ്രകാരമാണ്:”നിങ്ങളുടെ ജന്മദിനത്തില് വയസ്സ് കണക്കാക്കേണ്ടത് നേടിയ സുഹൃത്തുക്കളുടെ അടിസ്ഥാനത്തിലാണ്, അല്ലാതെ വര്ഷങ്ങള് എണ്ണിയല്ല”.
ചില കാര്യങ്ങള് ശ്രദ്ധിച്ചാല് സൗഹൃദങ്ങള്ക്ക് ആയുസ്സ് വര്ധിക്കും:-
- കൂട്ടുകെട്ടുകളും, സൗഹൃദങ്ങളും ഒന്നാണെന്ന് തെറ്റിധരിക്കരുത്. എപ്പോള് വേണമെങ്കിലും അഴിയാവുന്ന കെട്ടാണ് കൂട്ടുകെട്ട്. എന്നാല് യഥാര്ത്ഥ സൗഹൃദം അങ്ങനെയല്ല. അത് ഹൃദയങ്ങള് തമ്മിലുള്ള അടുപ്പമാണ്.
- യഥാര്ത്ഥ സുഹൃത്തുക്കള് എന്തെങ്കിലും നേട്ടത്തിനു വേണ്ടിയാവില്ല നമ്മോടൊപ്പം കൂടുക. നമ്മുടെ കുടുംബമഹിമയോ, സമ്പത്തോ, പദവിയോ ഒന്നുമാവില്ല അടുപ്പം സൂചിപ്പിക്കുന്ന അളവുകോല്. അതിനെല്ലാം എത്തിപ്പിടിക്കാവുന്നതിനും എത്രയോ ഉയരത്തിലാകും, അവരുടെ മനസ്സില് നമ്മുടെ സ്ഥാനം. അത് മനസ്സിലാക്കി കഴിഞ്ഞാല് ആ സൌഹൃദങ്ങളെ അമൂല്യമായി കരുതി മുന്നോട്ടു കൊണ്ടുപോകണം.
- നല്ല സുഹൃത്തുക്കള് ആരെന്നറിയാന് എളുപ്പമാര്ഗ്ഗമൊന്നുമില്ല. കാത്തിരിക്കുക. നമ്മുടെ ജീവിതത്തില് ചില അടിയന്തിരഘട്ടങ്ങള് വന്നെത്തുമ്പോള് യഥാര്ത്ഥ സുഹൃത്തുക്കള് തന്നെയാകും നമ്മുടെ അരികില് അടിയുറച്ചു നില്ക്കുന്നുണ്ടാവുക.
- ചങ്ങാത്തത്തിനു മുന്നില് അഭിനയിക്കാതിരിക്കുക. സൗഹൃദം തരുന്ന പ്രതീക്ഷയും, ആത്മാര്ത്ഥതയും വളരെ വലുതാണ്. അതുകൊണ്ട് തുറന്ന മനസ്സോടെ പരസ്പരം ഇടപെട്ടാല് സൌഹൃദങ്ങള്ക്ക് കൂടുതല് തിളക്കമേറും.
- സുഹൃത്തുക്കളോടുള്ള ചെറിയ അഭിപ്രായവ്യത്യാസങ്ങള് പോലും തുറന്നു പറയുക, പരിഹരിക്കുക.
- നിങ്ങളുടെ കുടുംബത്തിലെ എല്ലാവരുമായും ചങ്ങാതികളുടെ വിശേഷങ്ങള് പങ്കു വെയ്ക്കുക. അവരുമായി ചങ്ങാതിമാരെ അടുപ്പിക്കുവാനുള്ള ശ്രമങ്ങള് നടത്തുക.
- ഓഫീസ്, വീട്, സൗഹൃദം – ഇത് മൂന്നും വിപരീത ദിശകളിലോടുന്ന വാഹനങ്ങള് ആവാതിരിക്കാന് ശ്രദ്ധിക്കുക. മൂന്നിനും സമയം കൊടുത്തുകൊണ്ട് പരസ്പരം കൂട്ടിമുട്ടാതെ മുന്നോട്ടു കൊണ്ടുപോവുക.