ഏതുതരം ബന്ധങ്ങളിലും സംഭവിക്കാവുന്ന ഒന്നാണ് സോഫ്റ്റ് എക്സിറ്റ് തിയറി. പതുക്കെ പതുക്കെ ബന്ധങ്ങളിൽ നിന്ന് പിൻവാങ്ങുന്നതാണ് ഈ രീതി
മെസേജ് അയച്ചാലുടനെ പ്രതികരിച്ചുകൊണ്ടിരുന്ന ചങ്ങാതി പതിവായി ഇപ്പോൾ മറുപടി നല്കാൻ വൈകുന്നു. ബ്ലൂടിക്ക് വീഴുന്നതും നോക്കി കണ്ണുകുഴയുന്നു.ഒരു നേരം കാമുകനെ കണ്ടില്ലെങ്കിൽ ആശങ്കപ്പെട്ട് ഫോൺ ചെയ്തിരുന്ന കാമുകിക്ക് ഇപ്പോൾ ഒരാഴ്ച കഴിഞ്ഞും അവനെ കണ്ടില്ലെങ്കിലും പ്രശ്നമില്ലാതായിരിക്കുന്നു. പ്രണയബന്ധങ്ങളിലോ സുഹൃദ്ബന്ധങ്ങളിലോ മാത്രമല്ല ദാമ്പത്യബന്ധത്തിൽ പോലും കണ്ടുവരുന്ന ഒരു പ്രവണതയുടെ രണ്ടു സംഭവങ്ങളാണ് മുകളിൽ പരാമർശിച്ചിരിക്കുന്നത്. എന്താണ് ഇവിടെ സംഭവിക്കുന്നത്? പരസ്പരമുള്ള ബന്ധത്തിൽ അകൽച്ച ആരംഭിച്ചുവെന്നും പരസ്പരമുള്ള ബന്ധം അവസാനിപ്പിക്കാൻ ഒരാൾ തീരുമാനിച്ചിരിക്കുന്നു എന്നതിന്റെയും സൂചനയാണ് ഇവയെന്നാണ് മനശ്ശാസ്ത്രവിദഗ്ദർ പറയുന്നത്. ബന്ധം പിരിയുന്നു എന്ന് നേരിട്ടുപറയുന്നതിന് പകരം ആ ബന്ധത്തിൽ നിന്ന് പതുക്കെ പിൻവാങ്ങുകയാണ് ഇവിടെ ചെയ്യുന്നത്. വലിയ വഴക്കുകളോ ആരോപണപ്രത്യാരോപണങ്ങളോ ഇല്ലാതെ മറ്റെയാളെ വിഷമിപ്പിക്കാതെയും കുറ്റബോധത്തിൽ വീഴ്ത്താതെയും ബന്ധത്തിൽ നിന്ന് ഒഴിവാകാൻ അയാൾ നടത്തുന്ന ബോധപൂർവമായ പരിശ്രമം. അതാണ് പുതിയ ടേം ആയ സോഫ്റ്റ് എക്സിറ്റ് തിയറി.
ബന്ധങ്ങളിൽ നിന്ന് മെല്ലെ മെല്ലെ ഒഴിവായിപ്പോകുന്നതിന് ഒരാൾ നടത്തുന്ന ഇത്തരം ശ്രമങ്ങളുടെ മറ്റ് ചില സൂചനകൾ കൂടി പറയാം. മെസേജുകൾ കുറയുക, മിനിറ്റുകൾക്കുള്ളിൽ മറുപടി ത്ന്നിരുന്നവർ ദിവസങ്ങൾ കഴിഞ്ഞിട്ടും മറുപടി നല്കാതിരിക്കുക, ദീർഘമായ സംസാരങ്ങൾ കുറയുക, വിളികളുടെ എണ്ണവും സംസാരത്തിന്റെ ദൈർഘ്യവും കുറയുക, അധികം സംസാരിക്കാതെ ഫോൺവിളി അവസാനിപ്പിക്കുക. നേരിട്ടു കാണാൻ ആഗ്രഹം പ്രകടിപ്പിച്ചാൽ തിരക്കു ഭാവിക്കുക, ഒരിക്കലും കാണാൻ തയ്യാറാവാതിരിക്കുക. ഭാവിയിൽ ഒരുമിച്ചുനടത്താൻ പ്ലാനിടുന്ന യാത്രകളെക്കുറിച്ചുപറയുമ്പോൾ നിശ്ശബ്ദത പാലിക്കുക (നിങ്ങൾ ഒരുമിച്ച് യാത്ര ചെയ്യാൻ അവർ ആഗ്രഹിക്കുന്നില്ല) സ്നേഹപ്രകടനങ്ങൾ കുറയുക, കെട്ടിപ്പിടിക്കുന്നതിനോ കൈകോർത്തുപിടിക്കുന്നതിനോ തയ്യാറാവാതെവരുക, ഒരു സുഹൃത്ത്/ പങ്കാളി എന്നതിനെക്കാൾ ഒരു അപരിചിതനെപോലെയോ അല്ലെങ്കിൽ കേവലം പരിചയക്കാരെപോലെയോ മാത്രം ഇടപെടുക..
ഇങ്ങനെ എടുത്തുപറയാൻ പല ലക്ഷണങ്ങളുമുണ്ട്. ഇന്നലെ വരെ വളരെയധികം അടുപ്പത്തിലായിരുന്ന രണ്ടുപേർ തമ്മിൽ സ്നേഹബന്ധത്തിന്റെയും ഇടപെടലുകളുടെയും കാര്യത്തിൽ ഇത്തരത്തിലുള്ള അകൽച്ചകൾ വർദ്ധിച്ചുവരുന്നതെങ്കിൽ മിക്കവാറും അത് ബന്ധംതുടരാൻ താല്പര്യമില്ല എന്നതിന്റെ സൂചനയാണ്.
സുഹൃത്തോ പ്രണയഭാജനമോ ഇത്തരത്തിലുള്ള പെരുമാറ്റമാണ് കാഴ്ചവയ്ക്കുന്നതെങ്കിൽ നേരിട്ടു സംസാരിച്ച് കാര്യങ്ങളിൽ വ്യക്തതവരുത്തുക. സാഹചര്യം മനസ്സിലാക്കി സ്വയം സംരക്ഷിക്കാൻ ശ്രമിക്കുക അല്ലെങ്കിൽ പുറകെ നടന്ന് സ്നേഹം പിടിച്ചുപറ്റാൻ ശ്രമിച്ച് സ്വന്തം വില കളയുകയും ജീവിതം തകർക്കുകയുമായിരിക്കും ചെയ്യുക.