എന്തൊരു ദേഷ്യമാടാ ഇത്.
ചില മക്കളോട് മാതാപിതാക്കള് ഇടയ്ക്കെങ്കിലും പറയുന്ന വാചകമാണ് ഇത്.
അതുപോലെ, ഇങ്ങനെയാണോടാ പെരുമാറുന്നത്, ഇങ്ങനെയാണോ സംസാരിക്കുന്നത് എന്നെല്ലാം അവര് ചോദിച്ചുകൊണ്ടേയിരിക്കും. ഈ സംസാരത്തിനും പ്രവൃത്തിക്കും ദേഷ്യപ്പെടലിനുമെല്ലാം തങ്ങള് ഉത്തരവാദികളല്ല എന്ന മട്ടിലാണ് മാതാപിതാക്കളുടെ സംസാരം.
എന്നാല് അവര് സൗകര്യപൂര്വം മറക്കുന്ന ഒരു കാര്യമുണ്ട്. തങ്ങളുടെ ദേഷ്യവും പൊട്ടിത്തെറിയും സംസാരത്തിലെ വാക്കുകളുമാണ് മക്കള് ഉപയോഗിക്കുന്നതെന്ന്. ഒരുപക്ഷേ കാലം കഴിയുകയും പ്രായമേറുകയും മക്കള് വലുതാകുകയും ചെയ്തപ്പോള് മാതാപിതാക്കള് പണ്ടുള്ളതിനെക്കാള് ശാന്തരായിട്ടുണ്ടാവാം.
എങ്കിലും പൊട്ടിത്തെറിച്ചിരുന്ന, മോശം വാക്കുകള് ഉപയോഗിച്ചിരുന്ന ഒരു കാലം അവര്ക്കുണ്ടായിരുന്നു. ആ കാലത്തില് നിന്നുകൊണ്ടാണ് അവര് മക്കളെ വളര്ത്തിയെടുത്തത്. ഇന്ന് മക്കള് പറയുന്ന ഓരോ വാക്കുകളും ചെയ്യുന്ന ഓരോ പ്രവൃത്തികളും ഇടപെടലുകളുടെ സ്വഭാവവും എല്ലാം അവര് ചെറുപ്പത്തിലേ സ്വാംശീകരിച്ചെടുത്തത് മാതാപിതാക്കളില് നിന്നായിരുന്നു. അവര് കണ്ടുവളര്ന്ന ലൈവ് ഷോ മാതാപിതാക്കളുടെ ജീവിതവും പെരുമാറ്റവും പ്രവര്ത്തനങ്ങളുമായിരുന്നു.
മക്കള് കണ്ടുപഠിക്കുന്ന ആദ്യ പുസ്തകം മാതാപിതാക്കളുടെ ജീവിതമാണെന്നത് പണ്ടുമുതല്ക്കേ ആവര്ത്തിച്ചുപോരുന്ന ഒരു സത്യമാണ്. മാതാപിതാക്കളുടെ ചേഷ്ടകള്, സംസാരിക്കുന്ന രീതി, ഉച്ചാരണം ഇതെല്ലാം കുട്ടികള് അനുകരിക്കുന്നുണ്ട്. വീട്ടിലെ മുതിര്ന്നവരോട് മക്കള് ബഹുമാനമില്ലാതെ സംസാരിക്കുന്നുണ്ടോ അതിന്റെ കാരണം തിരക്കി മറ്റെവിടെയും പോകണ്ട, വീട്ടില് നിന്ന് അവര് കേട്ടുമനസ്സിലാക്കിയതും കണ്ടുമനസ്സിലാക്കിയതുമായ കാര്യത്തിന്റെ പ്രതികരണമാണ് അത്.
കുടുംബത്തിന് വെളിയിലേക്ക് ഇറങ്ങുമ്പോള് അവിടെ നിന്ന് കിട്ടുന്ന പാഠങ്ങളും അവര് പഠിച്ചുതുടങ്ങുന്നു. അധ്യാപകര്, സുഹൃത്തുക്കള്, സ്കൂള് ബസിലെ ചേട്ടനും ചേച്ചിയും ഇവരൊക്കെ ചില സ്വാധീനങ്ങളാണ്. പക്ഷേ അത്തരം സ്വാധീനങ്ങളില് നിന്നുപോലും അകന്നുനില്ക്കാന് കുടുംബത്തില് അവര്ക്ക് കിട്ടിവരുന്ന പരിശീലനം സഹായിക്കും എന്നതാണ് സത്യം.
പുറമേ നിന്ന് കേള്ക്കുന്ന ഒരു വാക്ക് നല്ലതാണോ ചീത്തയാണോ എന്ന് മനസ്സിലാക്കാനും അത് പ്രയോഗിക്കേണ്ടതാണോ തള്ളിക്കളയേണ്ടതാണോ എന്ന് തിരിച്ചറിയാനും വീട്ടില് നിന്ന് കിട്ടുന്ന പാഠങ്ങള് ഏറെ സഹായിക്കും. മാതാപിതാക്കളുമായി നല്ല ബന്ധം പുലര്ത്തുന്ന മക്കള്ക്ക് മാത്രമേ തങ്ങളുടെ ജീവിതത്തിലെ നല്ല കാര്യങ്ങളും മോശം കാര്യങ്ങളും തുറന്നു പറയാനും കഴിയൂ.
മക്കളുടെ നല്ല രീതിയും പെരുമാറ്റവുമാണ് നിങ്ങള് ആഗ്രഹിക്കുന്നതെങ്കില് നിര്ബന്ധമായും ആരോഗ്യകരമായ അന്തരീക്ഷം കുടുംബത്തില് നിലനിര്ത്താനാണ് മാതാപിതാക്കള് ശ്രദ്ധിക്കേണ്ടത്. ചീത്തവാക്കുകള് പരസ്പരം കടിച്ചുതുപ്പുകയും പരസ്പരം കുറ്റപ്പെടുത്തുകയും വിലകുറച്ച് കാണുകയും ചെയ്യുന്ന രീതികള് അവസാനിപ്പിക്കുക, കുടുംബാംഗങ്ങള് എല്ലാവരും കൂടി ഒരുമിച്ചിരുന്ന് ഭക്ഷണം കഴിക്കുകയും സമയം ചെലവഴിക്കുകയും ചെയ്യുന്ന രീതി ആരംഭിക്കുക, മോശം കാര്യങ്ങളെക്കുറിച്ചോ ഒരു വ്യക്തിയെക്കുറിച്ചോ സംസാരിക്കാന് തുടങ്ങുന്നതിന് മുമ്പ് പറയാന് പോകുന്ന വാക്കുകളെ ഒന്ന് സ്ക്രീന് ചെയ്യുക…
ഇങ്ങനെ മാതാപിതാക്കളില് നിന്ന് സമൂലമായ ഒരു മാറ്റം ഉണ്ടായാല് മാത്രമേ അത് മക്കളിലും പ്രതിഫലിക്കുകയുള്ളൂ.ചുരുക്കത്തില് മക്കളെ അന്ധമായി വിധിയെഴുതാതെയും കുറ്റപ്പെടുത്താതെയും സ്വന്തം ജീവിതക്രമത്തിലും രീതികളിലും മാതാപിതാക്കള് മാറ്റം വരുത്തുകയാണ് ആദ്യം വേണ്ടത്. അപ്പോള് മക്കള് നന്നായിക്കോളും.