നമ്മൾ വിചാരിക്കുന്നതുപോലെയല്ല നമ്മുടെ ജീവിതത്തിൽ പലതും സംഭവിക്കുന്നത്. രോഗവും അപകടവും പോലെയുള്ളവ നമ്മുടെ ജീവിതത്തെ വളരെപെട്ടെന്ന് താറുമാറാക്കുകയും ഇല്ലാതാക്കുകയും ചെയ്യുന്നവയാണ്. എന്നാൽ ചില ശീലങ്ങൾ നമ്മുടെ ജീവിതത്തെ പതുക്കെപതുക്കെ നശിപ്പിക്കുന്നവയാണ്. നാം പോലും അറിയുന്നില്ല അവ നമ്മുടെ ജീവിതത്തെ ദോഷകരമായി ബാധിക്കുമെന്ന്. മദ്യപാനവും പുകവലിയും എന്നൊക്കെയായിരിക്കും ഇതുപറയുമ്പോൾ പലരുടെയും മനസ്സിലേക്ക് പെട്ടെന്ന് കയറിവരുന്ന ചിന്ത. എന്നാൽ അവ മാത്രമല്ല നമ്മുടെ ജീവിതത്തെ പതുക്കെകൊല്ലുന്ന ശീലങ്ങളായിട്ടുള്ളത്.
ചിലർക്ക് യാഥാർത്ഥ്യങ്ങളെ ഉൾക്കൊള്ളാനുള്ള കഴിവില്ല. അവർ ചില സ്വപ്നങ്ങളിലോ അലസതയിലോ ജീവിക്കുന്നവരായിരിക്കും. യാഥാർത്ഥ്യം യാഥാർത്ഥ്യം തന്നെയാണ്. എത്ര കണ്ട് ഒളിച്ചോടാൻ ശ്രമിച്ചാലും മൂടിവയ്ക്കാൻ ശ്രമിച്ചാലും അത് അവശേഷിക്കുന്നുണ്ട്. മരണം, സ്നേഹത്തകർച്ച, ബിസിനസ് പരാജയം, പരീക്ഷാതോൽവി ഇതൊക്കെ ചില യാഥാർത്ഥ്യങ്ങളാണ്. ഇതിനെ മനസ്സുകൊണ്ട് അംഗീകരിച്ചും ഉൾക്കൊണ്ടും മുന്നോട്ടുപോയില്ലെങ്കിൽ ജീവിതം വഴിമുട്ടും. യാഥാർത്ഥ്യങ്ങളുടെ അനന്തരഫലങ്ങൾ ഉൾക്കൊളളാനുള്ള വിമുഖതയാണ് യാഥാർത്ഥ്യങ്ങളെ തന്നെ അംഗീകരിക്കുന്നതിൽ നിന്ന് ഇത്തരക്കാരെ വിലക്കുന്നത്.
സാമ്പത്തികമായ അച്ചടക്കമില്ലായ്മയാണ് മറ്റൊരു കാരണം. വരവിലും കൂടുതലായി ചെലവ് ചെയ്യുക, ആവശ്യമില്ലാത്തതും വാങ്ങിക്കൂട്ടുക. മറ്റുള്ളവരെ സന്തോഷിപ്പിക്കാനും അവരുടെ സ്നേഹം പിടിച്ചുപറ്റാനുമായി തന്റെ സമ്പത്തിന്റെ നല്ലൊരുപങ്കും ചെലവഴിക്കുക.. ഇങ്ങനെ പലതരത്തിൽ സാമ്പത്തികനിയന്ത്രണം നഷ്ടപ്പെടുത്തുന്ന ഒരാൾക്ക് ജീവിതത്തിൽ വിജയിക്കാനോ ഉയരാനോ കഴിയില്ല. വരുമാനത്തിന്റെ ഒരു ഭാഗമെങ്കിലും സമ്പാദ്യമായി നീക്കിവയ്ക്കാൻ കഴിയണം. ചെലവ് നിയന്ത്രിച്ചു സമ്പാദ്യമുണ്ടാക്കാനും കൂടുതൽ വരുമാനമുണ്ടാക്കാനും ബോധപൂർവ്വമായ ശ്രമങ്ങളില്ലാത്തവർ പതുക്കെപതുക്കെ ദരിദ്രരായി മാറുകയും ജീവിതം നശിക്കുകയും ചെയ്യും.
ക്ഷമയില്ലായ്മയും കാത്തിരിക്കാനുള്ള മനസ്സില്ലായ്മയുമാണ് ചില ജീവിതങ്ങളെ ദോഷകരമായി ബാധിക്കുന്നത്. കാത്തിരുന്നാൽ തെളിയുന്നതാണ് പുഴകളെന്ന് ഒരു പ്രയോഗമുണ്ട്. പക്ഷേ ഇക്കൂട്ടർക്ക് കാത്തിരിക്കാനാവില്ല. അതുപോലെ സഹിഷ്ണുത ലവലേശവുമില്ല. വ്യക്തിത്വത്തിലെ ഈ രണ്ടുപ്രത്യേകതകളും ജീവിതവിജയത്തിന് ഏല്പിക്കുന്ന ആഘാതം വളരെ വലുതായിരിക്കും.
ചിലർ പാലങ്ങൾ തകർക്കുന്നവരും മതിലുകൾ പണിയുന്നവരുമായിരിക്കും. ഇത് നമ്മുടെ ജീവിതത്തെ നശിപ്പിക്കും. പരസ്പരമുള്ള പാലങ്ങൾ അനിവാര്യമാണ്.വളരാനും കൊടുക്കൽ വാങ്ങലുകൾക്കും എല്ലാം. എന്നാൽ പാലം നഷ്ടപ്പെടുത്തുമ്പോൾ അവർക്ക് ബന്ധങ്ങൾ ഇല്ലാതാവുകയും വളരാനുള്ള അവസരങ്ങൾ നഷ്ടപ്പെടുകയും ചെയ്യും. നമുക്ക് പല സാധ്യതകളും തെളിഞ്ഞുവരുന്നത് ബന്ധങ്ങൾ വഴിയാണ്. ബന്ധങ്ങളെ തകർക്കുന്നതിലൂടെ സാധ്യതകളും നശിപ്പിക്കപ്പെടുകയാണ്. ആരോഗ്യകാര്യങ്ങളിൽ ശ്രദ്ധപതിപ്പിക്കാത്തവരും പതിവായി മെഡിക്കൽ ചെക്കപ്പ് നടത്താത്തവരും പതുക്കെപതുക്കെ ജീവിതത്തെ നശിപ്പിക്കുന്നവരാണ്. വ്യായാമം, പതിവായ മെഡിക്കൽ ചെക്കപ്പ് എന്നിവ എല്ലാവർക്കും ആവശ്യമാണ്.പലരും അനാരോഗ്യവാന്മാരായി തുടരുന്നതും ചിലർക്കൊക്കെ പാതിവഴിയിൽ ജീവിതം അവസാനിപ്പിക്കേണ്ടിവരുന്നതുമൊക്കെ ഇവയുടെ അഭാവം കൊണ്ടാണ്.