ഷാമ്പൂ പുരട്ടി മുടിയെല്ലാം പൊഴിഞ്ഞു എന്ന പരാതി പലപ്പോഴും കേള്ക്കാറുണ്ട്. പരസ്യങ്ങളില് കാണുന്ന എല്ലാ ഷാമ്പൂവും മാറി മാറി പരീക്ഷിക്കുന്നവര്ക്കാണ് ഈ അബദ്ധം സാധാരണ സംഭവിക്കുന്നത്. മുടിയുടെ സ്വഭാവം തിരിച്ചറിഞ്ഞ് ഷാമ്പൂ ഉപയോഗിക്കുകയാണ് വേണ്ടത്.
ചര്മ്മം പോലെതന്നെ മുടിയുടെയും സ്വഭാവം മൂന്നു തരത്തിലാണ്. എണ്ണമയം കൂടുതലുള്ള മുടി, സാധാരണ മുടി, വരണ്ട മുടി.
എണ്ണമയം കൂടുതലുള്ള മുടി
എണ്ണമയം കൂടുതലുള്ള മുടിയാണെങ്കില് ഷാമ്പൂ പുരട്ടി കുളിച്ചാലും ഒറ്റ ദിവസംകൊണ്ട് മുടിയില് എണ്ണമെഴുക്കുള്ള അവസ്ഥയിലാവും. മുടി പരസ്പരം ഒട്ടിക്കിടക്കും. അഴുക്കുകള് പെട്ടെന്ന് മുടിയില് അടിയും. ഇത്തരക്കാര്ക്ക് ഡൈലി ഷാമ്പൂ ആണ് ഇണങ്ങുക. വീര്യം കുറഞ്ഞതും, നാരങ്ങ ചേര്ന്നതുമായ ഡെയ്ലി ഷാമ്പൂ തെരഞ്ഞെടുക്കാം. ദിവസവും പുരട്ടാന് കഴിഞ്ഞില്ലെങ്കിലും ആഴ്ചയില് നാല്, അഞ്ചു ദിവസമെങ്കിലും എണ്ണമയമുള്ള മുടിയില് ഷാമ്പൂ പുരട്ടി കഴുകി വൃത്തിയാക്കണം. കുളിക്കും മുമ്പായി എണ്ണ പുരട്ടേണ്ട ആവശ്യമേയില്ല. എന്നാല് കുളിക്കും മുമ്പ് തലമുടി പലപ്രാവശ്യം ചീകുന്നത് തലയോട്ടിയിലെ എണ്ണമയം മുടിയുടെ അറ്റംവരെ എത്തിക്കും.
സാധാരണ മുടി
സാധാരണ മുടിയാണെങ്കില് തലയോട്ടിയില് എണ്ണമയം ഉണ്ടാവുകയും, മുടിയുടെ അറ്റം വരണ്ടിരിക്കുകയും ചെയ്യും. അതുകൊണ്ട് ഷാമ്പൂ പുരട്ടി കുളിക്കും മുമ്പ് മുടിയുടെ അഗ്രഭാഗത്ത് എണ്ണ പുരട്ടുകയും, കുളി കഴിഞ്ഞു കണ്ടീഷണര് പുരട്ടുകയും വേണം. ഇത്തരം മുടി കെട്ടുപിണയാന് സാധ്യത ഏറും. അകന്ന പല്ലുള്ള ചീപ്പ് കൊണ്ട് ചീവി ഇത് ഒഴിവാക്കാം.
വരണ്ട മുടി
മുടി വരണ്ടതാണെങ്കില് സ്ഥിരമായി ഷാമ്പൂ ഉപയോഗിക്കുന്നത് മുടി പൊട്ടിപ്പോകാന് ഇടയാക്കും. വരണ്ട മുടിക്കാര് ആഴ്ചയില് ഒരുതവണ ഷാമ്പൂ പുരട്ടിയാല് മതിയാവും. ചെറുചൂടുള്ള എണ്ണ പുരട്ടി പതിനഞ്ചു മിനിറ്റ് മസാജ് ചെയ്ത ശേഷം വേണം എണ്ണ പുരട്ടുന്നത്. വെള്ളം തുടച്ചു കളഞ്ഞ ശേഷം അല്പം കണ്ടീഷണര് പുരട്ടി അഞ്ചു മിനിട്ടിനു ശേഷം കഴുകി കളയുക. ഒപ്പം കണ്ടീഷണര് തലയോട്ടിയില് പുരളാതെ സൂക്ഷിക്കുകയും വേണം. കണ്ടീഷണര് തലയോട്ടിയില് പറ്റിപ്പിടിച്ചിരുന്നു താരന്റെ അളവ് കൂട്ടും. കുളി കഴിഞ്ഞാല് ടവ്വല് ചെറുചൂടുവെള്ളത്തില് മുക്കിപ്പിഴിഞ്ഞു മുടിയില് ആവി കൊള്ളിക്കണം. ഇത് രക്ത ഓട്ടം കൂട്ടുകയും ചര്മ്മത്തിലെ എണ്ണമയം വര്ധിപ്പിക്കുകയും ചെയ്യും. മാസത്തില് ഒരിക്കലെങ്കിലും ഹെയര്സ്പാ ചെയ്യുന്നത് നല്ലതാണ്.