വളരെ പെട്ടെന്ന് പൊട്ടിത്തെറിക്കുന്നവരും ദേഷ്യപ്പെടുന്നവരുമായി ഒരുപാടു പേർ നമുക്ക് ചുറ്റിനുമുണ്ട്. കാരണമില്ലാതെയും നിസ്സാര കാര്യങ്ങൾക്ക് വേണ്ടിയും പൊട്ടിത്തെറിക്കുന്നവർ. പക്ഷേ ഇത്തരക്കാർ അറിയുന്നില്ല അവർ തങ്ങളുടെ ഹൃദയത്തെ അപകടത്തിലാക്കുകയാണ് ചെയ്യുന്നതെന്ന്. ദേഷ്യം ഹൃദയാരോഗ്യത്തിന് വളരെ അപകടകാരിയാണ് എന്നാണ് വിദഗ്ദരുടെ അഭിപ്രായം. എന്നാൽ ദേഷ്യം അടക്കിവയ്ക്കുന്നതോ? അതും നല്ലതല്ലത്രെ. കാരണം ദേഷ്യം കൊണ്ട് മനസ്സ് പുകയുമ്പോൾ അഡ്രിനാലിൻ ഹോർമോണുകൾ ശരീരത്തിൽ കൂടുതലായി ഉല്പാദിപ്പിക്കപ്പെടുകയും അതിന്റെ ഫലമായി രക്തസമ്മർദ്ദം കൂടുകയും ചെയ്യും. ക്രമേണ ഹൃദയാഘാതവും പിടികൂടിയേക്കാം. അതുകൊണ്ട് ദേഷ്യത്തെ നിയന്ത്രിക്കുക മാത്രമേ പോംവഴിയായിട്ടുള്ളൂ.
പലപ്പോഴും വെറുപ്പും അസൂയയും സ്നേഹക്കുറവുമൊക്കെയായിരിക്കും ദേഷ്യത്തിന് കാരണമാകുന്നത്. സ്നേഹമുളള ഒരു വ്യക്തി അഹിതകരമായത് ചെയ്താൽ പോലും നാം അമിതമായി ദേഷ്യപ്പെടണം എന്നില്ല. പക്ഷേ സ്നേഹക്കുറവു തോന്നിക്കുന്ന വ്യക്തി മനപ്പൂർവ്വമല്ലെങ്കിൽ പോലും ചെയ്യുന്ന പ്രവൃത്തികൾ ദേഷ്യത്തിലേക്ക് തള്ളിയിട്ടേക്കാം. അതുകൊണ്ട് മനസ്സ് ശുദ്ധമാക്കുക. കഴിയുന്നത്ര മറ്റുള്ളവരെ സ്നേഹിക്കാൻ ശ്രമിക്കുക. മനസ്സിന്റെ സ്വസ്ഥതയും സ്വച്ഛതയുമാണ് ദേഷ്യത്തെ നിയന്ത്രിക്കാൻ പ്രേരിപ്പിക്കുന്നത്. ഇനി ദേഷ്യം വരുമ്പോൾ അതിനെ നിയന്ത്രിക്കാനും സമചിത്തത പാലിക്കാനും ചെയ്യേണ്ട കാര്യങ്ങളെക്കുറിച്ചു കൂടി ചിന്തിക്കാം. ദേഷ്യം വരുമ്പോൾ ദീർഘനിശ്വാസമെടുത്ത് ഒന്നുമുതൽ പത്തുവരെ എണ്ണുക. ഇത് ഫലപ്രദമായ ഒരു മാർഗ്ഗമായി പലരും നിർദ്ദേശിച്ചിട്ടുളളതാണ്. അതുപോലെ മനസ്സിനെ ശാന്തമാക്കാനായി കണ്ണടച്ചിരുന്ന് ഏതെങ്കിലും പ്രകൃതിദൃശ്യങ്ങൾ മനസ്സിലേക്ക് കൊണ്ടുവരികയുമാകാം.
ധ്യാനം, പ്രാർത്ഥന എന്നിവയും ദേഷ്യത്തെ കീഴടക്കാൻ സഹായകമാണ്. മനസ്സിന്റെ ശാന്തത ഭഞ്ജിക്കപ്പെടുന്നതാണ് ദേഷ്യത്തിന്റെ കാരണം. ബന്ധങ്ങൾ ആരോഗ്യപൂർവ്വം നിലനിർത്തിക്കൊണ്ടുപോകുകയോ ഉൗഷ്മളമായ സ്നേഹബന്ധങ്ങൾ കാത്തുസൂക്ഷിക്കുകയോ ചെയ്താൽ ഒരുപരിധിവരെ ദേഷ്യത്തിൽ നിന്ന് മോചിതരാകാൻ കഴിയും. ഇൗഗോയും അപകർഷതാബോധവും അകാരണമായോ നിസ്സാരകാര്യങ്ങളുടെപേരിലോ ഉള്ള പൊട്ടിത്തെറികൾക്ക് കാരണമാകാറുണ്ട്. നിങ്ങളുടെ ദേഷ്യത്തെ വരുതിയിൽ നിർത്താനും ദേഷ്യം നിയന്ത്രിക്കാനും നിങ്ങൾക്ക് മാത്രമേ സാധിക്കൂ എന്ന കാര്യം മറക്കരുത്. അതിനു മുമ്പ് ഒരു ചോദ്യത്തിന് കൂടി നിങ്ങൾ ഉത്തരം കണ്ടെത്തേതുണ്ട്. എന്തുകൊണ്ടാണ് നിങ്ങൾ എപ്പോഴും ദേഷ്യപ്പെടുന്നത്?