ബന്ധങ്ങളുടെ ലോകത്തിലാണ് നാം ജീവിക്കുന്നത്.  പലരുമായി നാം ബന്ധപ്പെട്ടിരിക്കുന്നു. വീട്ടിലും ഓഫീസിലും പൊതുഇടങ്ങളിലുമെല്ലാം പലതരം ബന്ധങ്ങളുടെ കണ്ണികൾ കോർക്കപ്പെട്ടുകിടക്കുന്നു. എന്നിട്ടും ചിലയിടങ്ങളിൽ ചില ബന്ധങ്ങൾ അയഞ്ഞുകിടക്കുന്നു. ചിലത് പൊട്ടികിടക്കുന്നു. ചിലത് കൂടിച്ചേരാതെ കിടക്കുന്നു. എന്തുകൊണ്ടാണ് ഇങ്ങനെ സംഭവിക്കുന്നത്?
 ബന്ധങ്ങൾ തകരുന്നതിനു പിന്നിലുള്ള ചില കാരണങ്ങളെ നമുക്കിവിടെ പരിശോധിക്കാം

തെറ്റിദ്ധാരണകൾ

പല ബന്ധങ്ങളും തകരുന്നതിന് പിന്നിലെ ഒരു കാരണം തെറ്റിദ്ധാരണയാണ്. മറ്റേയാൾ പറഞ്ഞ വാക്കിനെ അയാൾ ചെയ്ത പ്രവൃത്തിയെ, അയാളുടെ ഇടപെടലിനെ ഒക്കെ  തെറ്റിദ്ധരിക്കുമ്പോൾ  ബന്ധങ്ങളിൽ ശൈഥില്യം സംഭവിക്കുന്നു. അല്ലെങ്കിൽ പൂർണ്ണതയിലേക്ക് വളരുന്നതിന് തടസം  സൃഷ്ടിക്കപ്പെടുന്നു. അതുകൊണ്ട് ഏതുതരം ബന്ധങ്ങളിലും തെറ്റിദ്ധാരണകൾ ഉണ്ടാകാതിരിക്കാൻ പരസ്പരം ശ്രദ്ധിക്കുക. ഉണ്ടായാൽതന്നെ അത് പറഞ്ഞ് തിരുത്തുകയോ വ്യക്തത വരുത്തുകയോ ചെയ്യുക.

മുൻവിധികൾ

അയാൾ ഇങ്ങനെയായിരിക്കും, അങ്ങനെയായിരിക്കും എന്നെല്ലാമുള്ള മുൻവിധികൾ ബന്ധങ്ങളുടെ  വളർച്ച മുരടിപ്പിക്കുന്നു. ബന്ധത്തിലേക്ക് വരുന്നതിന് മുമ്പുള്ള ഇത്തരം മുൻവിധികൾ യാതൊരു ഫലവും സൃഷ്ടിക്കുന്നില്ല.  ഏതൊരു വ്യക്തിയുമായി ബന്ധം സ്ഥാപിക്കാൻ ആഗ്രഹിക്കുന്നുവോ അയാളെ മുൻവിധികൾ കൂടാതെ സ്വീകരിക്കുക.

സ്വാർത്ഥത

ബന്ധങ്ങളെ സ്വാർത്ഥതയ്ക്കുവേണ്ടി വിനിയോഗിക്കുന്നവരുടെ എണ്ണം വർദ്ധിച്ചുകൊണ്ടിരിക്കുന്ന കാലമാണ് ഇത്. നീയുമായി ബന്ധം സ്ഥാപിച്ചാൽ എനിക്കെന്ത് നേട്ടമുണ്ടാകും എന്ന് വിചാരിച്ച് ബന്ധം സ്ഥാപിക്കുന്നവരുണ്ട്. മറ്റുള്ളവരെ തനിക്ക് കയറിപ്പോകാനുള്ള ഏണിപ്പടികളായി പ്രയോഗിക്കുന്നവർ. ആവശ്യം കഴിയുമ്പോഴോ പ്രയോജനപ്പെടുകയില്ലെന്ന് തോന്നുമ്പോഴോ ഉപേക്ഷിച്ചുപോകുന്നവരാണ് ഇവർ. ഇത്തരക്കാരുമായുള്ള ബന്ധം ദോഷവും വേദനയും നഷ്ടവുമല്ലാതെ മറ്റൊന്നും നല്കുന്നില്ല. സ്വാർത്ഥതയില്ലാതെ സ്നേഹബന്ധങ്ങളിൽ മുഴുകിയാൽ മാത്രമേ അവ ദീർഘകാലം നിലനില്ക്കുകയും പൂചൂടുകയുമുള്ളൂ.  സ്വാർത്ഥത ബന്ധങ്ങളിൽ നിഴൽ വിരിക്കുമ്പോൾ ഓടിയകലനാണ് എല്ലാവരും ശ്രദ്ധിക്കുന്നത്.

ആത്മാർത്ഥതയില്ലായ്മ

പറയുന്നതും ചെയ്യുന്നതും തമ്മിലുള്ള അടുപ്പം ബന്ധങ്ങളുടെ വളർച്ചയ്ക്ക് അനുയോജ്യമായ ഗുണമാണ്. ഒരാളെ വിശ്വാസത്തോടെ കണക്കിലെടുക്കുകയും പിന്നീട് അയാൾ കള്ളനാണയമായിരുന്നുവെന്ന് തിരിച്ചറിയുകയും ചെയ്യുമ്പോൾ ബന്ധം വിച്ഛേദിക്കപ്പെടേണ്ടിവരും. സുഹൃദ്ബന്ധം മുതൽ കുടുംബബന്ധങ്ങൾ വരെയുള്ള എല്ലാത്തരം ബന്ധങ്ങളും ആത്മാർത്ഥമായിരിക്കണം.

ഈഗോ

ഞാനാണ് വലുത്, ഞാനാണ് എല്ലാറ്റിനും അധിപൻ, എന്റെ അഭിപ്രായങ്ങളാണ് ശരി, ഞാൻ പറയുന്നതാണ് ശരി ഇങ്ങനെ ബലം പിടിക്കുന്നവരുണ്ട്.  ഓരോരുത്തരുടെയും ഈഗോയാണ് ഇങ്ങനെ വിലപിച്ചുകൊണ്ടിരിക്കുന്നത്. ഇത്തരക്കാർ എപ്പോഴും വക്താക്കളായിരിക്കും, അഭിപ്രായങ്ങൾ മറ്റുള്ളവരിൽ അടിച്ചേല്പിക്കുന്നവരായിരിക്കും. മറ്റുള്ളവരെക്കുറിച്ച് നല്ലതു പറയാത്തവരായിരിക്കും. സ്വന്തം നേട്ടങ്ങളെയും കഴിവുകളെയും കുറിച്ച് മാത്രം സംസാരിക്കുന്നവരുമായിരിക്കും. വ്യക്തിയിലെ ഈ സ്വഭാവപ്രത്യേകത ബന്ധങ്ങൾക്ക് വലിയ വില്ലനാണ്.
 ഇനി ഓരോരുത്തരും സ്വയം ആലോചിച്ചുനോക്കട്ടെ, എന്റെ ബന്ധങ്ങൾ എങ്ങനെയാണ് തകർന്നത്, എവിടെയാണ് തകർന്നത്?