സന്തുഷ്ടകരമായ ദിവസത്തിനും ജീവിതത്തിനും

ജീവിതത്തിന്റെ സംഗീതം താളബദ്ധതയോടെ ആസ്വദിക്കാൻ പലപ്പോഴും സഹായിക്കുന്നത് അനുദിനകാര്യങ്ങളിൽ നാം കൊണ്ടുനടക്കുന്ന ചില ശീലങ്ങളാണ്. പലപ്പോഴും തീരെ ചെറിയ കാര്യങ്ങൾ മതിയാവും ജീവിതത്തിന്റെ സൗന്ദര്യം മുഴുവൻ നഷ്ടപ്പെടുത്താൻ. അതുപോലെ തീരെ ചെറിയ കാര്യങ്ങൾ മതിയാവും ജീവിതം മുമ്പത്തെക്കാളും സൗന്ദര്യം നിറഞ്ഞതാകാനും.

ആരോഗ്യപരമായ  നല്ല ശീലങ്ങളിലൂടെ ജീവിതത്തിൽ ഗുണകരമായ മാറ്റങ്ങൾ ഉണ്ടാക്കാനും അത് നമുക്ക് മാത്രമല്ല ചുറ്റിനുമുള്ളവർക്ക് കൂടി പ്രയോജനപ്പെടുത്താനും സാധിക്കും.

ഇതാ അനുദിനജീവിതത്തിൽ നാം ചെയ്യേണ്ട ചില കാര്യങ്ങൾ..ഇത്തരം കാര്യങ്ങളിൽ അല്പം ശ്രദ്ധ കൊടുത്താൽ അത് ജീവിതം മുഴുവൻ സുഗന്ധം നിറയ്ക്കുക തന്നെ ചെയ്യും.

ദിനം മുഴുവൻ ജോലിയുടെ സംഘർഷങ്ങളുമായി കഴിഞ്ഞുകൂടുമ്പോൾ ഇത്തിരിനേരം പാട്ടിനായി നീക്കി വയ്ക്കുക.  നിങ്ങളുടെ താല്പര്യത്തിന് അനുസരിച്ചുള്ള നിങ്ങളെ നല്ല മൂഡിലേക്ക് നയിക്കുന്ന വിധത്തിലുള്ള സംഗീതമാണ് കേൾക്കേണ്ടത്. കുറച്ചുനേരം ഇങ്ങനെ പാട്ട് കേട്ടിരുന്നാൽ മനസ്സ് ശാന്തമാകും. ജോലിയിലെ പിരിമുറുക്കങ്ങൾ കുറയുകയും ചെയ്യും.

ജോലിക്കിടയിൽ നിരന്തരം കാപ്പികുടിക്കുന്നത് ഉന്മേഷം തരുമെന്ന് വിശ്വസിക്കുന്ന പലരുമുണ്ട്. എന്നാൽ കാപ്പി കുടിക്കുന്നത് പലപ്പോഴും ഉറക്കം നഷ്ടപ്പെടുത്തുകയും സ്‌ട്രെസും ഉതകണ്ഠയും വർദ്ധിപ്പിക്കുകയുമാണ് ചെയ്യുന്നത്.  അതുകൊണ്ട് കാപ്പിക്ക് പകരം ചായ എന്നാക്കുക. ഗ്രീൻ ടീ ഇതിൽ പ്രധാന പങ്കുവഹിക്കുന്നു. ആന്റിഓക്‌സിഡന്റ് ഘടകങ്ങൾ ചായയിൽ കൂടുതലുണ്ട്.

ഇന്നൊരു നശിച്ച ദിവസമാണ് എന്ന് വിചാരിച്ചാണ് കിടക്കയിൽ നിന്നെണീല്ക്കുന്നതെങ്കിൽ പലപ്പോഴും അത് നശിച്ച ദിവസം തന്നെയായിരിക്കാനാണ് സാധ്യത. എന്നാൽ ഇന്നൊരു നല്ല ദിവസമാണല്ലോ, എനിക്ക് കുറെയധികം കാര്യങ്ങൾ ചെയ്യാനുണ്ടല്ലോ, എന്റെ മുമ്പിൽ ഒരുപാട് അവസരങ്ങളുണ്ടല്ലോ എന്നെല്ലാം വിചാരിച്ച് പ്രഭാതത്തെ സ്വാഗതം ചെയ്താലോ.. അത് ചുറ്റുപാടുകളിൽ തന്നെ വലിയ മാറ്റമുണ്ടാക്കും.. ആദ്യം നിങ്ങൾ നിങ്ങളിൽ തന്നെ വിശ്വസിക്കുക..മഹത്തായ ചില കാര്യങ്ങൾ ചെയ്യാനുള്ള വ്യക്തിയാണെന്ന് സ്വയം പറയുക. അത് നിങ്ങളെ ആത്മവിശ്വാസമുള്ളവനാക്കും. നിങ്ങൾക്ക് അതുവഴി ലഭിക്കുന്ന ഊർജ്ജം മറ്റുള്ളവരിലേക്കും പകരപ്പെടും.

നിത്യവും അടിസ്ഥാനപരമായ ചില എക്‌സർസൈസുകൾ ചെയ്യുന്നത് നമ്മുടെ ശരീരത്തിന് ഭാവിയിൽ  നല്ല ഫലം ചെയ്യും. അനുദിനം എക്‌സർസൈസുകൾ ചെയ്യുമ്പോൾ നമുക്കതിന്റെ റിസൾട്ട് അപ്പോൾതന്നെ മനസ്സിലാകണം എ്ന്നില്ല. പക്ഷേ ശരീരത്തിന് ഗുണകരമായ നിരവധി മാറ്റങ്ങൾ ഉണ്ടാക്കാൻ ഇത്തരം എക്‌സർസൈസുകൾക്ക് കഴിവുണ്ട്. അതുകൊണ്ട് കഴിയുന്നത്രവിധത്തിലുള്ള എക്‌സർസൈസുകൾ എല്ലാ ദിവസവും ചെയ്യുക.  ജീവിതത്തിലെ പല കാര്യങ്ങളും ദുഷ്‌ക്കരമല്ല എന്നതാണ് യാഥാർത്ഥ്യം. എങ്ങനെയാണ് അവ ചെയ്യുന്നത് എന്നതാണ് ശ്രദ്ധിക്കേണ്ടത്.അത്തരം തിരിച്ചറിവുണ്ടാകുക എന്നത് പ്രധാനവുമാണ്.

ലിഫ്റ്റും എക്‌സലേറ്ററും പലയിടങ്ങളിലും വ്യാപകമായിക്കഴിഞ്ഞിട്ടുണ്ട്. നടത്തവും കിതപ്പും ഒഴിവാക്കാൻ പലരും ഉപയോഗിക്കുന്നതും അതുതന്നെയാണ്. എന്നാൽ നമുക്ക് അത് ഒഴിവാക്കി പതുക്കെ പടികൾ കയറിത്തുടങ്ങിയാലോ? സാധിക്കുന്നത്ര തവണ പടികൾ കയറുന്നത് നമ്മുടെ ശരീരത്തിന് പോസിറ്റിവായ ഫലങ്ങൾ ഉണ്ടാക്കുന്നുണ്ട്.

പലരും തിരക്കുപിടിച്ച ജീവിതത്തിൽ ഭക്ഷണം വെട്ടിവിഴുങ്ങുകയാണ്. സാവധാനം ചവച്ചരയ്ക്കാൻ അവർക്ക് സമയം കിട്ടുന്നില്ല. ഭക്ഷണം സാവധാനം ചവച്ചരയ്ക്കുന്നത് ദഹനപ്രക്രിയയ്ക്ക് ഏറെ ഗുണം ചെയ്യും ഉമിനീരിൽ ദഹനത്തെ സഹായിക്കുന്ന എൻസൈമുകൾ അടങ്ങിയിട്ടുണ്ട്.

കിടക്കപ്പായയിൽ നിന്നെണീറ്റ് ഉടനെ ഓഫീസിലേക്ക് ഓടാതെ കുളിയും മറ്റ് കാര്യങ്ങളും വൃത്തിയോടും ചിട്ടയോടും ചെയ്യുക. നിങ്ങൾ നിങ്ങളുടെ ശരീരത്തെ എല്ലാ ദിവസവും സ്പർശിക്കുന്നത് വലിയൊരു കാര്യമാണെന്ന് മറക്കരുത്. എന്നാൽ അതൊരിക്കലും തിരക്കുപിടിച്ച് ആകരുത്. സമയമെടുത്തും ആസ്വദിച്ചും കുളിക്കുക.. ശരീരം വളരെയധികം ആസ്വദിക്കുന്നുണ്ട് കുളി. നല്ല സോപ്പോ ബോഡി വാഷോ കുളിക്കായി ഉപയോഗിക്കാം.. സുഗന്ധപൂരിതമായ ആ  സോപ്പ് അന്നേ ദിവസം മുഴുവൻ നമ്മെ ഉന്മേഷഭരിതനാക്കും. ശരീരത്തിന് മാത്രമല്ല വ്യക്തിത്വത്തിന് തന്നെ അത് ഗുണം ചെയ്യും.