ആരോഗ്യമുള്ള കുഞ്ഞിനെക്കുറിച്ച് സംസാരിക്കുമ്പോൾ എല്ലായ്പ്പോഴും സ്ത്രീയുടെ ആരോഗ്യമാണ് പ്രധാനമായും ചർച്ച ചെയ്യപ്പെടുന്നത്. എന്നാൽ കുഞ്ഞിന്റെ ആരോഗ്യവും ഭാവിയും നിശ്ചയിക്കുന്നതിൽ അത്രത്തോളം തന്നെ നിർണ്ണായകമാണ് പുരുഷന്റെ ആരോഗ്യവും. പുരുഷന്റെ ജീവിതശൈലിയും ശാരീരികമാനസികാരോഗ്യവും അടുത്ത തലമുറയെ ദോഷകരമായി ബാധിക്കാം. ബീജങ്ങളുടെ ഗുണമേന്മ നിശ്ചയിക്കുന്നതിൽ പ്രധാന പങ്കുവഹിക്കുന്നത് പുരുഷന്റെ ആരോഗ്യമാണ്. പോഷകാഹാരക്കുറവും മദ്യപാനവും പുകവലിയുമുള്ള പുരുഷന്മാരുടെ ബീജം ഗർഭധാരണത്തിൽ ബുദ്ധിമുട്ടുകൾ സൃഷ്ടിക്കുകയും കുഞ്ഞിന് ജനിതകപ്രശ്നങ്ങൾക്ക് വഴിയൊരുക്കുകയും ചെയ്യുന്നു. പ്രായം കൂടുതലുള്ള പുരുഷന്മാർക്ക് -പ്രത്യേകിച്ച് നാല്പതിനുമേൽ പ്രായം- ജനിക്കുന്ന കുട്ടികളിൽ ഓട്ടിസം, സ്ക്രിസോഫ്രീനിയ തുടങ്ങിയ രോഗങ്ങൾ ഉണ്ടാവാനുള്ള സാധ്യത വളരെ കൂടുതലാണെന്നാണ് പഠനങ്ങൾ പറയുന്നത്.
പുരുഷന്റെ അനാരോഗ്യം കുട്ടികളിൽ വളർച്ച വൈകല്യങ്ങളും ഭാവിയിൽപ്രമേഹം, ഹൃദ്രോഗം പോലെയുളള അസുഖങ്ങളും സൃഷ്ടിക്കുന്നു. പുരുഷന്റെ അനാരോഗ്യകരമായ ഭക്ഷണരീതിയും സമ്മർദ്ദവും വിഷപദാർത്ഥങ്ങളുമായുളള സമ്പർക്കവും ജീനുകളുടെ പ്രവർത്തനം മാറ്റാൻ ഇടയാക്കുന്നവയാണ്. തന്മൂലം അടുത്ത തലമുറയിലേക്ക് ഇവ പകരപ്പെടാനുള്ള സാധ്യത കൂടുതലാണ്. പുകവലി, മദ്യപാനം, അമിതവണ്ണം, വ്യായാമക്കുറവ് എന്നിവയെല്ലാം പുരുഷന്റെ ബീജഗുണത്തെ ദോഷകരമായി ബാധിക്കുന്നവയാണ്. പുകവലി മൂലം ബീജത്തിന്റെ ഡിഎൻഎ യ്ക്ക് കേടുവരുകയും മദ്യപാനം ഹോർമോൺ അസന്തുലിതാവസ്ഥ സൃഷ്ടിക്കുകയും ചെയ്യുന്നു.
അമിതവണ്ണം മൂലം ടെസ്റ്റോസ്റ്റിറോൺ കുറയുന്നു. വ്യായാമക്കുറവ് വന്ധ്യതയ്ക്ക് വഴിയൊരുക്കാം. ഒരു കുഞ്ഞിന് ജന്മംകൊടുക്കാൻ തീരുമാനിക്കുമ്പോൾ അതിനുമുമ്പ് പുരുഷൻ തന്റെ ആരോഗ്യകാര്യങ്ങളിൽ വേണ്ടത്ര ശ്രദ്ധ കൊടുക്കണം. പോഷകസമൃദ്ധമായ ഭക്ഷണം കഴിക്കുകയും പുകവലിയും മദ്യപാനവും ഒഴിവാക്കുകയും വേണം. സ്ഥിരമായി വ്യായാമം ചെയ്യണം. മാനസികസമ്മർദ്ദം നിയന്ത്രിക്കണം. ഹെൽത്തി ഫാദർ ഹെൽത്തി ജനറേഷൻ എന്നാണ് പറയപ്പെടുന്നത്. അതുകൊണ്ട് ആരോഗ്യകരമായ ഒരു തലമുറയെ വാർത്തെടുക്കാൻ അമ്മ മാത്രമല്ല അച്ഛനും ആരോഗ്യകാര്യങ്ങളിൽ ശ്രദ്ധിക്കേണ്ടതുണ്ട്.