മറ്റുള്ളവർ തമ്മിലുള്ള സംസാരമോ നോട്ടമോ കേൾ്ക്കുകയും കാണുകയും ചെയ്യുമ്പോൾ അവർക്കിടയിൽ പ്രണയമുണ്ടെന്ന് പലപ്പോഴും തോന്നിയിട്ടില്ലേ? എന്നാൽ നിങ്ങൾക്ക് ഒരാളോട് പ്രണയമുണ്ടെന്ന് നിങ്ങൾ എപ്പോഴെങ്കിലും മനസ്സിലാക്കിയിട്ടുണ്ടോ? നിന്നെക്കാൾ കൂടുതൽ നീ മറ്റൊരാളെ ശ്രദ്ധിക്കുമ്പോൾ, അയാളെക്കുറിച്ച് ഓർമ്മിക്കുമ്പോൾ, കാണാൻ ആഗ്രഹിക്കുമ്പോൾ അപ്പോൾ നീ അയാളുമായി പ്രണയത്തിലായിരിക്കുകയാണ്. സ്വന്തം ആത്മാവിനെയെന്നതുപോലെ മറ്റൊരാളെ കണ്ടെത്തുന്നതാണ് പ്രണയം.
മനുഷ്യവംശത്തിന്റെ ആരംഭം മുതൽ പ്രണയമുണ്ടായിരുന്നു, ആളുകൾ പ്രണയത്തിലുമായിരുന്നു. നമ്മുടെ സാഹിത്യത്തിന്റെയും കലകളുടെയും മുഖ്യപ്രതിപാദ്യവിഷയം പ്രണയം തന്നെയായിരുന്നു. പ്രണയത്തിന് മൂന്നു ഘടകങ്ങളുണ്ടെന്നാണ് ചില പ്രണയസിദ്ധാന്തങ്ങൾ പറയുന്നത്.
അടുപ്പമാണ് അതിലാദ്യത്തേത്. രണ്ടു വ്യക്തികൾക്ക് തമ്മിൽ മാനസികമായ അടുപ്പം തോന്നുന്നു. വൈകാരികമായ അടുപ്പവും. പരസ്പര അടുപ്പമാണ് പ്രണയബന്ധം തീവ്രമാക്കുന്നത്. ഒരാൾക്കു മാത്രമാണ് അടുപ്പം തോന്നുന്നതെങ്കിലും അതും പ്രണയമാണ്. പക്ഷേ പ്രണയം സാക്ഷാത്ക്കരിക്കപ്പെടണമെന്നില്ല.
അഭിനിവേശമാണ് രണ്ടാമത്തേത്. ശാരീരികമായി തോന്നുന്ന ആകർഷണവും ലൈംഗികത വരെയെത്തുന്ന പ്രവർത്തനവുമാണ് ഇവിടെ പ്രധാനം
തീരുമാനമെടുക്കലാണ് മൂന്നാമത്തെ തലം. ഈ വ്യക്തിയെ തന്നെ ജീവിതകാലം മുഴുവൻ സ്നേഹിക്കുമെന്നും ഒപ്പം ജീവിക്കുമെന്നുമുള്ള തീരുമാനമെടുക്കലാണ് അത്.
ഈ മൂന്നുകാര്യങ്ങൾ എത്രത്തോളം ശക്തവും തീവ്രവുമാണ് എന്നതനുസരിച്ചാണ് പ്രണയത്തിന്റെ, സ്നേഹത്തിന്റെ ആയുസും അടങ്ങിയിരിക്കുന്നത്. അവ മൂന്നും ചേരുമ്പോഴാണ് പ്രണയം പ്രണയമാകുന്നത്.