വിശ്വസ്തത ഒരു ഗുണമാണ്. ആജീവനാന്തമുള്ള ഒരു ഉടമ്പടിയാണ് . പ്രതിബദ്ധതയും സത്യസന്ധതയും ആദരവും അതിന്റെ ഭാഗമാണ്. നിങ്ങളോ അല്ലെങ്കിൽ നിങ്ങളുടെ പങ്കാളിയോ വിശ്വസ്തനാണോയെന്നറിയാൻ ചില സൂചനകൾ നല്കാം.
തുടർച്ചയായ ആശയവിനിമയം
ഏതൊരു ബന്ധത്തിന്റെയും മൂലക്കല്ല് ആശയവിനിമയമാണ്. അതും തുടർച്ചയായ ആശയവിനിമയം. വീട്ടിൽ നിന്ന് അകന്നിരിക്കുന്ന സാഹചര്യത്തിലോ ജോലിയുമായി ബന്ധപ്പെട്ട തിരക്കിനിടയിലോ എല്ലാം പങ്കാളിയുമായി തുടർച്ചയായി ആശയവിനിമയവും ബന്ധവും പുലർത്തുന്ന പുരുഷന് തന്റെ ഇണയെ ചതിക്കാനാവില്ല.
അതിരുകളെ ആക്രമിക്കുകയില്ല
ഇണയുടെ അതിരുകൾ വിശ്വസ്തനായ ഒരു പുരുഷൻ ആക്രമിക്കുകയില്ല. കാരണം ഓരോ വ്യക്തികൾക്കും അവർ അർഹിക്കുന്ന വിധത്തിലുള്ള ഒരു ഇടം കൊടുക്കേണ്ടതുണ്ടെന്ന് അയാൾക്കറിയാം. ഇടം നല്കുന്നുവെന്നത് അവരുടെ ഐഡന്റിറ്റിയെ അംഗീകരിക്കുകയും ആദരിക്കുകയും ചെയ്യുന്നുവെന്നതിന്റെ കൂടി തെളിവാണ്.
പങ്കാളിയെ തുല്യമായി പരിഗണിക്കും
പങ്കാളിയെ തന്നെപോലെ സ്നേഹിക്കുകയും പരിഗണിക്കുകയും ചെയ്യുന്ന വ്യക്തിയാണ് വിശ്വസ് തനായ പുരുഷൻ. തന്നെക്കാൾ മോശക്കാരിയായോ തനിക്കൊപ്പം യോഗ്യതയില്ലാത്തവളായോ അയാൾ ഒരിക്കലും അവളെ വീക്ഷിക്കുന്നില്ല. ഒരു ട്രോഫി പോലെ ഷോക്കെയ്സിൽ അവളെ പ്രതിഷ്ഠിക്കാതെ അവളുടേതായ സ്വപ്നങ്ങൾക്കും പാഷനും പി്ന്നാലെ അവളെ പറഞ്ഞയ്ക്കാൻ തയ്യാറുള്ള വ്യക്തിയാണ് അവൻ.
സ്വന്തം പ്രവൃത്തിയുടെ ഉത്തരവാദിത്തം അവൻ ഏറ്റെടുക്കും
തന്റെ പ്രവൃത്തിയുടെ ഫലം നല്ലതോ ചീത്തയോ ആയിരുന്നുകൊള്ളട്ടെ അതിന്റെ ഫലം ഏറ്റെടുക്കാൻ ധൈര്യം കാണിക്കുന്നവനാണ് വിശ്വസ്തനായ പുരുഷൻ. തന്റെ പിഴവുകൾക്ക് ന്യായീകരണം നിരത്തുകയോ മറ്റുള്ളവരെ കുറ്റപ്പെടുത്തുകയോ ചെയ്യാറുമില്ല.
പങ്കാളിയുടെ വിജയം അവരുടേതുകൂടിയാണ്
പങ്കാളിയുടെ വിജയവും പരാജയവും അവർ ഒരുപോലെ ഏറ്റെടുക്കുന്നു. നേട്ടവും കോട്ടവും ഒരേ മനസ്സോടെ സ്വീകരിക്കുന്നു.
പങ്കാളിയുടെ ആവശ്യങ്ങൾക്ക് മുൻഗണന കൊടുക്കുന്നു
പങ്കാളിയുടെ ആവശ്യങ്ങൾക്ക് മുൻഗണന കൊടുക്കുന്നവരാണ് വിശ്വസ്തരായ പുരുഷന്മാർ.തന്റെ ആവശ്യങ്ങൾ മാറ്റിവച്ചുപോലും പങ്കാളിയുടെ ആവശ്യങ്ങളെയും ആഗ്രഹങ്ങളെയും അവർ സാധിച്ചുകൊടുക്കും.