ചൈനയിലെ പുതുവർഷം മറ്റ് രാജ്യങ്ങളിലെ പുതുവർഷം പോലെയല്ല. ചാന്ദ്ര കലണ്ടർ അനുസരിച്ചാണ് ചൈനയിൽ പുതുവർഷം ആഘോഷിക്കുന്നത്. എല്ലാ വർഷവും ചൈനയിൽ പുതുവർഷദിനം മാറിക്കൊണ്ടിരിക്കാറുമുണ്ട്. ചൈനാക്കാരുടെ ഏറ്റവും പ്രധാനപ്പെട്ട ആഘോഷവും പുതുവർഷമാണ്.
പതിനഞ്ചു ദിവസം നീണ്ടുനില്ക്കുന്നതാണ് പുതുവർഷാഘോഷങ്ങൾ. ലോകത്തിന്റെ വിവിധ ഭാഗങ്ങളിലുള്ള ചൈനക്കാർ എല്ലാം തങ്ങളുടേതു മാത്രമായ പുതുവർഷാഘോഷങ്ങളിൽ മുഴുകാറുണ്ട്. ചുവപ്പുനിറത്തിലുള്ള കടലാസ് കഷ്ണങ്ങൾ വാതിലുകളിൽ ഒട്ടിച്ചും പരമ്പരാഗത ചുവപ്പുകളറുള്ള വസ്ത്രം ധരിച്ചുമാണ് ചൈനക്കാർ ന്യൂഇയർ ആഘോഷങ്ങളിൽ പങ്കെടുക്കുന്നത് നിയൻ ഗൗ എന്ന പേരിലുള്ള അരിപ്പൊടികൊണ്ടുള്ള കേക്കാണ് പുതുവർഷ വിരുന്നിന് ഉപയോഗിക്കുന്നത്.
ചൈനക്കാർ ഏറ്റവും കൂടുതൽ യാത്ര നടത്തുന്നതും ഇതോട് അനുബന്ധിച്ചാണത്രെ. കാരണം ടോൾ പിരിവില്ലാതെ ദേശാന്തരപര്യടനം നടത്താനുള്ള സുവർണ്ണാവസരമാണ് ഇത്. ലോകത്തിന്റെ വിവിധഭാഗങ്ങളിലുള്ള ചൈനക്കാർ ഈ ദിവസങ്ങളിൽ തങ്ങളുടെ പ്രിയപ്പെട്ടവരുമായി ഒരുമിച്ചുകൂടാറുണ്ട്. നിയൻ എന്ന സത്വത്തെ ചെണ്ട കൊ്ട്ടി ഓടിച്ചിരുന്ന പാരമ്പര്യത്തിൽ നിന്നാണ് പുതുവർഷാഘോഷം ചൈനയിൽ രൂപമെടുത്തത് എന്നാണ് വിശ്വസിക്കപ്പെടുന്നത്.
കഴിഞ്ഞ വർഷം ജനുവരി 25 നായിരുന്നു ചൈനക്കാർ പുതുവർഷം ആഘോഷിച്ചത്. എന്നാൽ മുൻവർഷങ്ങളിലേതിൽ തികച്ചും വ്യത്യസ്തമായിരുന്നു കഴിഞ്ഞവർഷത്തെ പുതുവർഷം. കാരണം കൊറോണ വ്യാപനം പൊട്ടിപുറപ്പെട്ടത് ചൈനയിൽ നിന്നായിരുന്നുവല്ലോ. മരണഭീതിയുടെ താഴ് വരയിലാണ് അന്ന് അവർ പുതുവർഷത്തെ വരവേറ്റത്. മാസ്ക്ക് അണിഞ്ഞ് മരണത്തെ മുഖാമുഖം നേരിൽ കണ്ടും അവർ പുതുവർഷത്തെ വരവേറ്റപ്പോൾ ലോകം ഒരിക്കലും കരുതിയിരുന്നില്ല അടുത്തവർഷം തങ്ങളും ഇതുപോലെയാകുമെന്ന്.
ഇപ്പോൾ സംഭവിച്ചുകൊണ്ടിരിക്കുന്നത് അതാണല്ലോ.